விடாமுயற்சி
விமர்சனம்
தயாரிப்பு - லைகா
இயக்கம் - மகிழ் திருமேனி
நடிப்பு - அஜித், திரிஷா, அர்ஜுன், ரெஜினா கசண்ட்ரா, ஆரவ்,
வெளியான தேதி - 6 பிப்ரவரி 2025
நேரம் - 2 மணி நேரம் 30 நிமிடம் 46 நொடி
ரேட்டிங் - 2.75/5
*கதை சுருக்கம்*
அஜித் மற்றும் திரிஷா இருவரும் காதலித்து திருமணம் செய்து கொண்டு அஜர்பைஜானில் வாழ்ந்து வருகின்றனர். 12 ஆண்டுகள் அன்போடு வாழ்ந்த அவர்களுக்குள் கருத்து வேறுபாடு ஏற்பட்டு, அஜித்தை விட்டு பிரிய நினைக்கிறார் திரிஷா. இந்த சூழ்நிலையில் அம்மா வீட்டுக்கு செல்லும் திரிஷாவை அழைத்துக் கொண்டு காரில் செல்கிறார் அஜித். அப்போது திரிஷா கடத்தப்படுகிறார். திரிஷாவை கடத்தியது யார், அவரை அஜித் மீட்டாரா என்பதே படத்தின் மீதி கதை.
*படம் எப்படி*
விடாமுயற்சி படம், பிரேக் டவுன் என்ற ஹாலிவுட் படத்தின் தழுவல் ஆகும். வழக்கமான சால்ட் அண்ட் பெப்பர் ஹேர் ஸ்டைலில் "என்ன ஆச்சு" என்ற வசனத்துடன் திரையில் அஜித் தோன்றினாலும் அடுத்த ஒரு சில காட்சிகளிலேயே இளமையாக வருகிறார். திரிஷாவிடம் அன்பை வெளிப்படுத்தும் போது காதல் ததும்ப நடித்துள்ளார். அதேநேரம் அவர் கடத்தப்பட்ட பிறகு ஒருவிதப் பதட்டத்துடன் மனைவியை தேடும் கணவனாக அழகான நடிப்பை வெளிப்படுத்தி உள்ளார். அதன் பிறகு மனைவிக்காக வில்லன்களை எதிர்க்கும் காட்சிகளில் ஆக்ஷன் ஹீரோவாக மாறிவிடுகிறார்.
குறிப்பாக அஜர்பைஜான் பாலைவன சாலையில் அஜித் கார் ஓடுவதற்கு பதிலாக பறக்கிறது. அவர் கார் ரேசர் என்பதால் இந்த காட்சிகள் ரியலிஸ்டிக்காக அமைந்துள்ளன. திரிஷாவுக்கு படத்தில் காட்சிகள் குறைவு என்றாலும் மனதில் பதியும்படியாக நடித்துள்ளார். திரையில் அழகுப் பதுமையாக தெரிகிறார்.
வில்லத்தனம் கலந்த ஜோடியாக அர்ஜுன் மற்றும் ரெஜினா மிரட்டி உள்ளனர். அதேபோல் ஆரவ்வும் போட்டி போட்டு நடித்துள்ளார். அஜித்துடன் காரில் சண்டை போடும் காட்சிகளில் ஸ்கோர் செய்கிறார். இவர்களை தவிர ரவி ராகவேந்திரா, ஜீவா ரவி, ரம்யா ஆகியோரும் தங்கள் கதாபாத்திரத்தை உணர்ந்து நடித்துள்ளனர்.
அனிருத்தின் இசையில் பாடல்கள் ரசிக்க வைக்கின்றன, பின்னணி இசையில் மிரட்டியுள்ளார். அதோடு அஜித் வரும் காட்சிகளில் போட்டுள்ள பிஜிஎம் வேற லெவல். ஓம் பிரகாஷின் ஒளிப்பதிவில் அஜர்பைஜான் அழகாக தெரிகிறது. பல ஆக்ஷன் காட்சிகளை ஹாலிவுட் தரத்தில் அற்புதமாக படமாக்கி உள்ளார்.
அஜித் போன்ற பெரிய ஹீரோக்கள் கிடைத்தால் ஒரு மாஸ் படத்தை ரசிகர்கள் விரும்பும் வகையில் கொடுக்க நினைக்காமல், ஒரு ஹாலிவுட் படத்தை தழுவி அதில் அஜித்தை நடிக்க வைத்துள்ளார் இயக்குநர் மகிழ் திருமேனி. தன்னுடைய வழக்கமான ஸ்டைலிலேயே இந்த படத்தையும் தந்துள்ளார். அஜித்தை வெறும் மாஸ் ஹீரோவாக மட்டும் காட்டாமல், ஆக்ஷன் கலந்த எமோஷன் ஹீரோவாக திரையில் காண்பித்துள்ளார்.
*பிளஸ் & மைனஸ்*
அஜித்தின் நடிப்பு மற்றும் ஆக்ஷன் காட்சிகள் படத்திற்கு பலமாக அமைந்துள்ளன. முதல் பாதி மெதுவாக சென்றாலும் ரசிக்க வைத்தது. ஆனால் இரண்டாம் பாதியில் வேகமெடுத்தாலும் தேவையில்லாத காட்சிகளால் சோர்வு ஏற்படுகிறது. முதல் பாதி முழுவதும் அஜித் எப்போது வில்லன்களை அடிப்பார் என ஏங்க வைக்கிறார். பெரிய அளவில் அஜித் - அர்ஜுன் இடையே சண்டைக் காட்சிகள் இல்லாதது ஏமாற்றம். அஜித் படம் வெளிவந்து இரண்டு ஆண்டுகள் ஆன நிலையில் மிகுந்த எதிர்பார்ப்போடு தியேட்டருக்கு வந்த ரசிகர்களுக்கு இந்த விடாமுயற்சி படம் சற்று ஏமாற்றத்தையே தந்துள்ளது.
விடாமுயற்சி - இன்னும் வேண்டும் பயிற்சி
விடாமுயற்சி தொடர்புடைய செய்திகள் ↓
பட குழுவினர்
விடாமுயற்சி
- நடிகர்
- நடிகை
- இயக்குனர்
அஜித் குமார்
நடிகர் அஜித்குமாரின் சொந்த ஊர் ஐதராபாத். 1971ம் ஆண்டு மே மாதம் 1ம்தேதி பிறந்த இவர், 1992ம் ஆண்டு பிரேம் புஸ்தகம் என்ற தெலுங்கு படத்தின் மூலம் திரையுலகிற்கு அறிமுகமானார். முதல் படத்திலேயே சிறந்த புதுமுகத்திற்கான விருது பெற்ற அஜித், தமிழில் அமராவதி படத்தின் மூலம் அறிமுகமானார். முதல் தமிழ் படம் வெற்றி பெறாவிட்டாலும் அடுத்தடுத்து பாசமலர்கள், பவித்ரா உள்ளிட்ட படங்களில் நடித்தார். அஜித்தின் முதல் வெற்றிப்படம் ஆசை. அதனைத் தொடர்ந்து காதல் மன்னன், வாலி, பூவெல்லாம் உன் வாசம், முகவரி, வில்லன், கண்டுகொண்டேன் கண்டு கொண்டேன், வரலறு, பில்லா உள்ளிட்ட பல்வேறு வெற்றிப்படங்களில் நடித்துள்ளார்.
அஜித்தின் ரசிகர்கள் அவரை "அல்டிமேட் ஸ்டார்" என்றும் "தல" என்றும் பட்டப்பெயர்களுடன் அழைக்கிறார்கள். அமர்களம் திரைப்படத்தில் நடிக்கும்போது நடிகை ஷாலினியை காதல் திருமணம் செய்து கொண்டார். இவர்களுக்கு அனோஸ்கா என்ற பெண் குழந்தை உள்ளது. அஜித் சிறந்த கார் பந்தய வீரர் என்பது கூடுதல் தகவல்.