2021 தீபாவளி ரேஸில் முந்துவது யார்?

06 நவ, 2021 - 11:35 IST

0 கருத்துகள் கருத்தைப் பதிவு செய்ய

எழுத்தின் அளவு:

2021ம் வருட தீபாவளிக்கு தியேட்டர்களில் அண்ணாத்த, எனிமி, ஆபரேஷன் ஜுஜுபி ஆகிய படங்களும், ஓடிடி தளங்களில் ஜெய் பீம், எம்ஜிஆர் மகன் ஆகிய படங்களும் வெளிவந்தன.

சூர்யா நடித்த ஜெய் பீம் படம் தீபாவளிக்கு இரண்டு நாட்களுக்கு முன்னதாகவே ஓடிடி தளத்தில் வெளியானது. படத்திற்குப் பெரும்பாலும் பாசிட்டிவ்வான விமர்சனங்களும், ரசிகர்களின் பாராட்டுக்களும் கிடைத்தன. ஒரு உண்மைச் சம்பவத்தை திரையில் சிறப்பாகக் கொண்டு வந்ததாக பாராட்டுக்கள் கிடைத்தன. அதே சமயம் சில குறியீடுகள் பற்றியும், ஒரு குறிப்பிட்ட சாதி பற்றியும் தவறான சித்தரிப்புகள் படத்தில் இடம் பெற்றதாக அந்த சாதியினர் கடும் எதிர்ப்புகளை வெளிப்படுத்தினர். ஆனாலும், தீபாவளி படங்களில் தாக்கத்தை ஏற்படுத்தும் ஒரு படமாக இந்தப் படம் அமைந்து தரமான படம் என்ற பெருமையை தட்டிச் சென்றுள்ளது.

ரஜினிகாந்த் நடித்த அண்ணாத்த படம் வழக்கம் போல அதிகாலைக் காட்சியிலிருந்தே பரபரப்பை ஏற்படுத்தியது. ஆனால், இரண்டு காட்சிகள் கடந்த பிறகு படத்தைப் பற்றி நெகட்டிவ்வான கருத்துக்கள்தான் அதிகம் பரவியது. தான் எடுத்த முந்தை படங்களின் காப்பி, வேறு சில படங்களின் காப்பி என கலந்து எடுத்துவிட்டார் சிவா என்ற விமர்சனங்கள் அதிகம் எழுந்தன. இருந்தாலும் ரஜினிகாந்த் தன்னுடைய மேஜிக் நடிப்பால் படத்தைக் காப்பாற்றிக் கொண்டிருக்கிறார் என்பதுதான் உண்மையாக உள்ளது. நேற்று முதல் படத்தை குடும்பம் குடும்பமாக வந்து பார்ப்பதாக தற்போது தியேட்டர் வட்டாரங்களில் இருந்து வரும் தகவல்கள் தெரிவிக்கின்றன. படம் பற்றி நெகட்டிவ் விமர்சனங்கள் எவ்வளவு வந்தாலும் கலெக்ஷனில் அண்ணாத்த அள்ளுவார் என்றே கோலிவுட் வட்டாரங்கள் கொடுக்கும் தகவலாக உள்ளது.

விஷால், ஆர்யா நடித்த எனிமி படம் இளம் சினிமா ரசிகர்களை ஓரளவிற்குக் கவர்ந்துள்ளது. ஆனாலும், படத்தில் நெகட்டிவ்வான விஷயங்கள் நிறையவே உள்ளன என்பது விமர்சகர்களின் கருத்து. நீளமான பிளாஷ்பேக்குகள், அழுத்தமில்லாத பல காட்சிகள், லிட்டில் இந்தியா ஒரே செட்டில் அதிகக் காட்சிகள், விஷால் - ஆர்யாவிடம் காணப்படாத ஏட்டிக்குப் போட்டியான நடிப்பு என பல உண்டு. இருப்பினும் அண்ணாத்த கிராமத்துக் கதையாக பி அன்ட் சி பக்கம் போய்விட எனிமி ஏ சென்டர் பக்கம் கொஞ்சம் தாக்குப் பிடிக்கலாம் என்கிறார்கள்.

சசிகுமார், சத்யராஜ், சமுத்திரக்கனி நடித்த எம்ஜிஆர் மகன் படம் ஓடிடி தளத்தில் வெளியானது. இன்னும் சில பல வருடங்களுக்கு சசிகுமார், சமுத்திரக்கனி எந்தக் கூட்டணியும் சேராமல் இருப்பதே நல்லது என ரசிகர்கள் வேண்டுகோள் வைக்கும் அளவிற்குப் படம் உள்ளது. இருவரும் இணைந்து நடித்த உடன்பிறப்பே படம் கடந்த மாதம்தான் வந்து சோதித்தது. ஒரு மாதத்திற்குள்ளாக மீண்டும் எம்ஜிஆர் மகன் படத்தில் இப்படியோ சோதிப்பது என ரசிகர்கள் புலம்பித் தள்ளுகிறார்கள். சிவகார்த்திகேயனுக்கு தான் இயக்கிய வருத்தப்படாத வாலிபர் சங்கம், ரஜினி முருகன் படங்களில் ஸ்டார் அந்தஸ்தை ஏற்படுத்திக் கொடுத்த பொன்ராம் பின்னர் சீம ராஜா படத்தில் சிவகார்த்திகேயனை சறுக்க வைத்தார். அந்த சறுக்கு மரத்தில் இப்போது சசிகுமாரை இறக்கிவிட்டார்.

சாம்ஸ் நடித்த ஆபரேஷன் ஜுஜுபி என்ற படம் வந்தது எத்தனை பேருக்குத் தெரியும் என்று தெரியவில்லை. நமக்கும் அந்தப் படம் பற்றி யாரும் எந்தத் தகவலும் சொல்லவில்லை.

நாளை ஞாயிற்றுக் கிழமை வரை தீபாவளி விடுமுறை நீடிக்கிறது. திங்கள் கிழமைதான் தியேட்டர்களில் வெளியான படங்களின் வசூல் எப்படி என்ற தகவல் வெளிவரும். அதுவரையில் 100 கோடி, 150 கோடி, பிளாக் பஸ்டர், சூப்பர் ஹிட், குடும்பம் குடும்பமாய், மக்கள் கொண்டாடும் என்ற பன்ச் விளம்பரங்கள் நமது காதுகளில் விழுந்து கொண்டே இருக்கும்.

Diwali2021

Annaatthe

Jaibhim

Enemy

MGRMagan

கருத்துகள் (0) கருத்தைப் பதிவு செய்ய

கொரோனா 2வது அலைக்குப் பிறகு ...

தெலுங்குக்கு தாவும் தமிழ் ஹீரோக்கள் ...

வாசகர்களே...

நீங்கள் பதிவு செய்யும் கமென்டுகள், செய்திக்கு கீழே வராமல், சைடில் தனி பெட்டியாக வருவது போல் மாற்றி உள்ளோம். இதில் வழக்கம் போல் உங்கள் கருத்துகளை படிக்கலாம். பதிவும் செய்யலாம். இது எப்படி இருக்கிறது என்ற உங்கள் கருத்தை எங்களுக்கு தெரிவியுங்கள். உங்கள் பின்னுாட்டம் மேலும் சிறப்பாக்குவதற்கு உதவி செய்யும். நன்றி

பின்னுாட்டத்தை பதிவு செய்ய