Dinamalar

'கேம் சேஞ்ஜர்' தோல்விக்கான காரணம் சொன்ன தில் ராஜு

தெலுங்குத் திரையுலகத்தின் முன்னணி தயாரிப்பாளர்களில் ஒருவர் தில் ராஜு. தமிழில் விஜய் நடித்து வெளிவந்த 'வாரிசு' படத்தைத் தயாரித்தவர். தெலுங்கில் கதைகளுக்கு முக்கியத்துவம் கொடுத்து படங்களை எடுத்து வசூலைக் குவித்தவர்.

பிரம்மாண்ட இயக்குனர் ஷங்கர், டாப் நடிகர் ராம் சரண், பாலிவுட் நடிகை கியாரா அத்வானி என சுமார் 400 கோடி செலவில் அவர் பிரம்மாண்டமாகத் தயாரித்து பொங்கலுக்கு வெளிவந்த பான் இந்தியா படமான 'கேம் சேஞ்ஜர்' தோல்விப் படமாக அமைந்தது. 50 சதவீதம் கூட வசூலிக்கவில்லை என்பது பாக்ஸ் ஆபீஸ் தகவல். அதே சமயம் அவர் தயாரிப்பில் வெளிவந்த மற்றொரு படமான 'சங்கராந்திகி வஸ்துனம்' படம் 40 கோடி பட்ஜெட்டில் தயாராகி 300 கோடிக்கும் அதிகமாக வசூலித்து பெரும் வெற்றிப் படமாக அமைந்தது.

'கேம் சேஞ்ஜர்' படத்தின் தோல்வி குறித்து தில் ராஜு, “கதைதான் காரணம், பட்ஜெட் அல்ல. கதையை விடவும் பட்ஜெட், பிரம்மாண்டத்தின் மீது கவனம் செலுத்தியது தவறு. கனமான கதைகள், நம்பிக்கையான இயக்குனர்களை வைத்து எங்கள் நிறுவனம் வெற்றி பெற்றுள்ளது. உச்சத்தில் இருக்கும் நடிகர், இயக்குனர்களுடன் கூட்டணி அமைப்பது முக்கியமல்ல.

கடந்த சில வருடங்களாக குண்டும் குழியுமான பாதையில் சென்று வந்தோம். 'சங்கராந்திகி வஸ்துனம்' வெற்றி எங்களுக்கு சரியான பாதையைக் காட்டியுள்ளது. சிலரது வேண்டுகோளுக்காக அதிக வசூல் என வெளியாகும் பொய்யான வசூல் விவரங்களை, எது உண்மை என மீடியாக்கள்தான் வெளிக்கொண்டு வர வேண்டும்,” என்றும் பேசியுள்ளார்.

'கேம் சேஞ்ஜர்' படத்தின் முதல் நாள் வசூல் 186 கோடி என வெளியிட்டார்கள். அது பெரும் சர்ச்சையை ஏற்படுத்தியது. அதன்பின் அந்தப் படத்தின் வசூல் என்ன என்பதை தில் ராஜு வெளியிடவேயில்லை. இப்போதும் படம் தோல்வி என்பதை ஒத்துக் கொண்டுள்ளார்.

'இந்தியன் 2, கேம் சேஞ்ஜர்' என அடுத்தடுத்து இரண்டு தோல்விகளைக் கொடுத்த இயக்குனராகிவிட்டார் ஷங்கர்.

• 
  நீதிமன்றம் கெடுபிடி : வெளிநாட்டு பயணத்தை ரத்து செய்த ஷில்பா ஷெட்டி
• 
  ஒரு டஜன் வாழைப்பழம் மட்டும் சம்பளமாக பெற்றுக்கொண்டு நடித்த கோவிந்தா
• 
  அரிய நோயால் பாதிக்கப்பட்டுள்ள பூமி பட்னேகர்
• 
  தீபிகா படுகோனேவின் குரல் இனி மெட்டா ஏஐ-யில் ஒலிக்கும்
• 
  மாதவனை பழிக்குப்பழி வாங்கி விட்டேன் : அஜய் தேவ்கன் பகிர்ந்த சுவாரஸ்ய ...

• 
  நடிகைகளை இதற்கு மட்டுமே பயன்படுத்துகிறார்கள் : ராதிகா ஆப்தே ஆதங்கம்
• 
  நிபந்தனையுடன் துல்கர் சல்மானின் லேண்ட்ரோவர் கார் திரும்ப ஒப்படைப்பு
• 
  கூகுள் கிளவுட் உடன் இணைந்த ஏஆர் ரஹ்மான்
• 
  எனக்கு பிடித்தமான ஹீரோ நானி : ருக்குமணி வசந்த்
• 
  சூர்யா 47- வது படத்தில் இணையும் பஹத் பாசில்