Dinamalar

எனக்கு எப்போதுமே கவுண்டமணிதான் குருநாதர்! -செந்தில்

கவுண்டமணி-செந்தில் காமெடி கூட்டணி தமிழ் சினிமாவில் பெரிய ரவுண்டு வந்தவர்கள். கவுண்டமணியின் 40 ஆண்டுகால திரைப்பயணத்தில் செந்திலுடன் 25 ஆண்டுகளாக நடித்தார். அப்படி அவர்கள் காமெடியன்களாக நடித்த காலகட்டத்தில் அவர்களுக்கான காமெடி ட்ரேக் எழுதியவர்கள் வீரப்பன் உள்ளிட்ட சில காமெடி ரைட்டர்கள் இருந்தனர். அந்த வகையில், டைரக்டர்கள் ஒரு பக்கம் கதை எழுதினாலும், இவர்களுக்கான காமெடி எழுதவும் ரைட்டர்கள் உருவாக்கப்பட்டனர்.

அப்படி கவுண்டமணி-செந்தில் இருவரும் கூட்டணி அமைத்த பெருவாரியான காமெடி காட்சிகளில் செந்திலை கவுண்டமணி அடிப்பது, மிதிப்பது போன்ற காமெடிகளும், கவுண்டமணியை செந்தில் மற்றவர்களிடம் மாட்டி விடுவது போன்ற காமெடி காட்சிகளும்தான் அதிகமாக இருந்தது. அந்த காமெடிக்கு ரசிகர்கள் மத்தியில் பெரிய வரவேற்பும் இருந்தன.

இந்த நிலையில், வடிவேலுவின் மார்க்கெட் சூடுபிடித்த பிறகு அவர்களது மார்க்கெட் டல்லடித்தது. அதனால் பின்னர் அவர்களின் கூட்டணியும் உடைந்தது. இப்போதும் கவுண்டமணி-செந்தில் இருவரும் வெவ்வேறு படங்களில் நடித்து வருகின்றனர். கவுண்டமணி நாயகனாக நடித்த 49ஓ வெளியாகியிருக்கும் நிலையில், செந்தில் நிழல் உலக தாதாவாக நடித்துள்ள திருட்டு விசிடி படமும் சமீபத்தில் வெளியானது. இந்த படத்தில் எனது குருநாதர் கவுண்டமணி என்று செந்தில் கூறும்படியான காட்சியும் உள்ளது.

இதுபற்றி செந்திலைக்கேட்டால், நான் சினிமாவுக்காக அப்படி சொல்லவில்லை. கவுண்டமணி எப்போதுமே எனது குருநாதர்தான். அவருடன் நான் நடித்த காலங்கள் பொற்காலம் என்றுதான் சொல்ல வேண்டும். அவரிடமிருந்து நான் நிறைய விசயங்களை தெரிந்து கொண்டவன் என்கிறார்.

• செய்திகள்