Dinamalar

ஐஎஸ் தீவிரவாதிகளுக்கு கண்டனம் தெரிவித்த ஏஞ்சலினா ஜோலி!

உலக அளவில் ஏராளமான ரசிகர்களை கொண்டவர் ஏஞ்சலினா ஜோலி. ஹாலிவுட் நடிகையான இவர், ஐநா சபையில் அகதிகளுக்கான பாதுகாப்பு தூதராகவும் செயல்பட்டு வருகிறார். அதனால், பெண்களுக்கு எதிராக கொடுமைகள் நடந்தால் உடனே தனது எதிர்ப்பை தெரிவித்து வருகிறார். இந்த நிலையில், தற்போது ஐ.எஸ் தீவிரவாத அமைப்பிற்கும் அவர் கடும் கண்டனம் தெரிவித்துள்ளார்.

அதுகுறித்து அவர் விடுத்துள்ள செய்தியில், ஈராக், சிரியா நாடுகளில் உள்ள ஐஎஸ் தீவிரவாதிகள் பெண்களை செக்ஸ் அடிமைகளாக பயன்படுத்தி வருகிறார்கள். இது ஒரு வன்கொடுமை செயலாகும். இதற்கு பயந்து ஏராளமான குடும்பங்கள் அகதிகளாக புலம்பெயர்ந்து வருகிறார்கள். இது உடனே தடுத்து நிறுத்தப்பட வேண்டும். அதோடு, பாலியல் பலாத்காரத்தை ஐஎஸ் தீவிரவாதிகள் ஆயுதங்களாகவும் பயன்படுத்தி வருகின்றனர். பெண்களுக்கு எதிரான இந்த வன்கொடுமைகளை அனைவரும் ஒன்றிணைந்து தடுக்க முன்வரவேண்டும் என்று உலக நாடுகளுக்கு ஏஞ்சலினா ஜோலி அழைப்பு விடுத்துள்ளார்.