Dinamalar

வி.டி.வி. கணேசுக்கு பட்டம் சூட்டிய சினிமாத்துறையினர்!

கெளதம்மேனன் இயக்கிய விண்ணைத்தாண்டி வருவாயா படத்தில் சிம்புவுடன் நடித்தவர் விடிவி கணேஷ். அதையடுத்து வானம், ஒஸ்தி, போடா போடி , நீதானே என் பொன்வசந்தம், கண்ணா லட்டு தின்ன ஆசையா, நவீன சரஸ்வதி சபதம் என பல படங்களில் நடித்தார் விடிவி கணேஷ. மேலும், இங்க என்ன சொல்லுது என்ற படத்தில் ஹீரோவாகவும் நடித்தார். அவருக்கு ஜோடியாக மீரா ஜாஸ்மின் நடித்திருநதார்.

இந்த படங்களில், சந்தானம், சேதுவுடன் இணைந்து அவர் நடித்த கண்ணா லட்டு தின்ன ஆசையா படத்தில் நடித்த வித்வான் கேரக்டர்தான் அவருக்கு பெரிய அளவில் பெயர் வாங்கிக்கொடுத்தது. அதனால், விடிவி கணேஷை எங்கு சந்தித்தாலும் வாங்க மாமா என்று அழைத்து வந்த சிம்பு, சந்தானம் இருவருமே அதன்பிறகு வாங்க குரல் அரசர் என்று அழைக்கத் தொடங்கினர்.

இப்படி அவர்கள் அழைத்ததைப்பார்த்து இப்போது மற்ற சினிமாக்காரர்களும் விடிவி கணேஷின் பெயரை சொல்லாமல் குரல் அரசர் என்றுதான் சொல்கிறார்கள். அது மட்டுமின்றி, சில சினிமா விழாக்களிலும் அவரை குரல் அரசர் விடிவி கணேஷ் என்று அழைக்கத் தொடங்கி விட்டனர். விளைவு, தன்னுடன் அவர் நடித்துள்ள வாலு படத்தில் அவரது பெயருக்கு முன்பு குரல் அரசர் என்ற பட்டத்தை சூட்டலாமா? என்று யோசித்துக்கொண்டிருக்கிறாராம் சிம்பு.

• செய்திகள்
• ஆல்பம்