Dinamalar

இமானுக்கு போன் செய்த விஜய் என்ன சொன்னார்?

இளையராஜா பாதி ஏ.ஆர்.ரஹ்மான் பாதி என்று சொல்லும் அளவுக்கு தனக்கு என்று தனி பாதையில் பயணித்து வருகிறார் இசையமைப்பாளர் டி.இமான். தொடர்ந்து ஹிட் பாடல்களைக் கொடுத்து வரும் டி.இமான், பிரபுசாலமனின் ஆஸ்தான இசையமைப்பாளராகவே இருந்து வருகிறார். மைனா, கும்கி படங்களைத் தொடர்ந்து பிரபுசாலமன் இயக்கத்தில், உருவாகிவரும் கயல் படத்திற்கும் டி.இமான்தான் இசையமைத்திருக்கிறார். டி.இமான் இசையமைப்பில் கயல் படத்தின் பாடல்கள் சமீபத்தில் வெளியாகின. இப்படத்தின் பாடல்களைக் கேட்ட விஜய், அவற்றை மெய்மறந்து கேட்டு ரசித்தாராம். ரசித்தது மட்டுமல்ல, உடனடியாக இசையமைப்பாளர் இமானுக்கு போன் செய்து, தன் பாராட்டுக்களையும் தெரிவித்திருக்கிறார்.

கயல் படத்தின் என் ஆள பாக்கப்போறேன்..., எங்கிருந்து வந்தாயோ... ஆகிய இரண்டு பாடல்கள்தான் இப்போது விஜய்யின் ஃபேவரைட் நம்பராம். அவருடைய ஐ பாடில் இந்தப் பாடல்கள்தான் ரிப்பீட் மோடில் இருக்கிறதாம். இசையமைப்பாளர் இமான் அறிமுகமானது விஜய்யின் தமிழன் படத்தின் மூலமாகத்தான். தமிழன் படத்துக்குப் பிறகு இந்த வருடம் பொங்கலுக்கு வெளிவந்த விஜய்யின் ஜில்லா படத்திற்கும் இமான்தான் இசையமைப்பாளர். அனேகமாக அட்லீ படத்துக்குப் பிறகு விஜய் நடிக்கும் படத்திற்கு இமான்தான் இசையமைப்பாளராக இருப்பார் என்று நம்பலாம்!

• இவரை பற்றி
• செய்திகள்
• ஆல்பம்