Dinamalar

பன்முக திறமையாளர், ‛நய்யாண்டி' அரசியல் நாயகன் சோ ராமசாமியின் பிறந்த தினம் இன்று....!

நடிகர், நாடக கதாசிரியர், வக்கீல், பத்திரிகையாளர், அரசியல் ஆலோசகர், திரைக்கதாசிரியர் என்று பல்துறை வல்லுநராக வாழ்ந்து காட்டிய சோ ராமசாமி, கலை மற்றும் அரசியல் உலகின் ஒரு சகாப்தம் என்றால் அது மிகையன்று. பல துறைகளிலும் தடம் பதித்து நிபுணத்துவம் பெற்றவரும், "அரசியல் நய்யாண்டி"யின் ஆணி வேருமான நடிகர் சோவின் 89வது பிறந்த தினம் இன்று... கலை, அரசியல் உலகின் சகாப்தமான ‛சோ' ராமசாமியின் நினைவலைகளை பார்க்கலாம்...

1934 அக்., 15ல் சென்னையில் பிறந்தார். பெற்றோர் சீனிவாசன் - ராஜலட்சுமி. பி.எஸ்.சி., பி.எல்., படித்துள்ளார். வக்கீலாக தொழிலைத் தொடங்கினார். 1957 - 1962 வரை சென்னை ஐகோர்ட்டில் வக்கீலாக பணியாற்றினார். திறமையான வழக்கறிஞராக பணிபுரிந்தார். டி.டி.கிருஷ்ணமாச்சாரி கம்பெனிக்கு சட்ட ஆலோசகராக இருந்தவர். 1966ல் திருமணம் நடந்தது. ஒரு மகனும், மகளும் உள்ளனர்.

"கல்யாணி" என்ற மேடை நாடகத்தின் மூலம் நாடக நடிகராகவும் அறியப்பட்டார். பகீரதன் என்பவர் எழுதிய "தேன் மொழியாள்" என்ற நாடகத்தில் இவர் ஏற்று நடித்த கதாபாத்திரத்தின் பெயர் 'சோ'. பின்னாளில் அதுவே அவரது பெயராக நிலைத்தது.

"பெற்றால்தான் பிள்ளையா" என்ற மேடை நாடகத்தில் கார் மெக்கானிக்காக நடித்திருந்தார் சோ. அதே நாடகம் "பார் மகளே பார்" என்ற பெயரில் திரைப்படமாக வந்தபோதும் அதே கார் மெக்கானிக்காக நடித்து சினிமாவில் அறிமுகமானார். தொடர்ந்து "மறக்க முடியுமா", "தேன்மழை", "நினைவில் நின்றவள்", "மனம் ஒரு குரங்கு", "கலாட்டா கல்யாணம்", "பொம்மலாட்டம்" என ஏராளமான படங்களில் நகைச்சுவை நடிகராக வலம் வந்தார்.

மற்ற நகைச்சுவை நடிகர்களிடமிருந்து முற்றிலும் மாறுபட்ட நடிப்பையும், உடல் மொழியையும், வசன உச்சரிப்பையும் வெளிப்படுத்தினார் சோ. அரசியல் கிண்டல், நய்யாண்டியோடு வந்த இவரது படங்களின் நகைச்சுவை, ரசிகர்கள் மட்டுமின்றி சக நடிகர்களையும் கவர்ந்தது.

சினிமாவில் நடித்தாலும் நாடகங்களில் அதிக ஆர்வம் கொண்டவர். நிறைய அரசியல் நையாண்டி நாடகங்களை எழுதி, இயக்கி உள்ளார். சாத்திரம் சொன்னதில்லை, நேர்மை உறங்கும் நேரம், இறைவன் இறந்துவிட்டானா, உண்மையே உன் விலை என்ன, மெட்ராஸ் பை நைட் உள்ளிட்ட பல நாடகங்களை எழுதி தயாரித்துள்ளார்.

14 திரைப்படங்களுக்கு கதை வசனம் எழுதி உள்ளார். 10 நாவல்களை எழுதியுள்ளார். மகாபாரதத்துக்கு விளக்கவுரை எழுதியுள்ளார். ராமாயணத்துக்கும் அவர் விளக்கம் எழுதினார். விவேகா நுண்கலை என்ற 40 பேர் குழுவை வழிநடத்தினார். 20 நாடகங்களை எழுதி, நடித்தும் இருக்கிறார். 27 டிவி தொடர்களுக்கு எழுதி, நடித்து சின்னத்திரையிலும் தனி முத்திரை பதித்தார் சோ.

1970ல் "துக்ளக்" என்ற பெயரில் வார இதழ் ஒன்றை துவங்கி, பத்திரிகை துறையில் தடம் பதித்தார். அரசியல் தலைவர்களை தனக்கே உரித்தான நய்யாண்டியோடு விமர்சனம் செய்தார். உண்மை என தோன்றியதையும் எழுதத் தயங்கவில்லை அவரது பேனா.

எம்ஜிஆர், சிவாஜி, ஜெமினி கணேசன், ஜெயலலிதா, ஜெய்சங்கர், முத்துராமன், ரஜினி, கமல் என பல பிரபலங்களுடன் 200 படங்கள் நடித்துள்ளார். "முகமது பின் துக்ளக்", "உண்மையே உன் விலை என்ன?", "மிஸ்டர் சம்பத்", "யாருக்கும் வெட்கமில்லை" ஆகிய படங்களுக்கு கதை வசனம் எழுதி இயக்குனராகவும் தன்னை வெளிப்படுத்தினார்.

முன்னாள் முதல்வர் மறைந்த ஜெயலலிதாவின் நெருங்கிய நண்பரான இவர் அவருக்கு அரசியல் ஆலோசனைகளையும் வழங்கி உள்ளார். எந்த அரசியல் கட்சையும் சாராதவராக இருந்த இவர் பா. ஜ.க., தலைவர்களிம் மட்டும் அதிகம் நெருக்கம் காட்டி வந்தார்.

மறைந்த முன்னாள் பிரதமர் வாஜ்பாயால் மாநிலங்களவை உறுப்பினராக தேர்ந்தெடுக்கப்பட்டு, 1999 முதல் 2005 வரை பொறுப்பு வகித்தார் சோ. "ஹால்டி காட்டி விருது", "வீர கேசரி" விருது, "கொயாங்கா விருது", "நச்சிக்கேதஸ் விருது" போன்ற விருதுகளை பெற்றுள்ளார்.

2016ல் உடல் நலம் பாதிக்கப்பட்டு, சென்னை அப்பல்லோ மருத்துவமனையில் அனுமதிக்கப்பட்டசோ, சிகிச்சை பலனின்றி 82வது வயதில் காலமானார். சோ மரணிப்பதற்கு இரு நாள் முன்னர் தான், ஜெயலலிதா அதே அப்பல்லோ மருத்துவமனையில் மரணித்தார் என்பது குறிப்பிடத்தக்கது. சோவின் மரணத்திற்குப் பின் 2017ல் "பத்மபூஷண் விருது" வழங்கி இந்திய அரசு கவுரவித்தது.

சோவின் அரசியல் நய்யாண்டியை எதிர்பார்த்த அரசியல் தலைவர்கள் ஏராளம் என்பது நிதர்சனமான உண்மை.

• 
  அமிதாப் பச்சன், ஏ.ஆர்.ரஹ்மானுக்கு லதா மங்கேஷ்கர் விருது வழங்கி கவுரவிப்பு
• 
  14 வருடங்களுக்குப் பிறகு அக்ஷய் குமாரை இயக்கும் பிரியதர்ஷன்
• 
  சிவாஜியின் மகன் சாம்பாஜி வாழ்க்கை சினிமா ஆகிறது
• 
  அக்ஷய் குமாருக்கு ஜோடியாக நடித்தால் விமர்சிப்பதா? - மனுசி சில்லார் ஆவேசம்
• 
  சல்மான் கானுக்கு ஜோடியாக கியாரா அத்வானி?

• 
  சவால் தான்... ஆனாலும் மகிழ்ச்சியே... - தமன்னா
• 
  'கல்கி 2898 ஏடி' ரிலீஸ் ஜூன் 27-க்கு தள்ளிப்போனது
• 
  விஜய் பிறந்தநாளில் வெளியாகும் கோட் இரண்டாவது பாடல்
• 
  அல்லு அர்ஜூன் சம்பளம் ரூ.150 கோடியா...
• 
  நெல்சன் - விஜய்யின் கனவு படத்தில் யாரெல்லாம் நடிக்கிறார்கள் தெரியுமா ?