மாறன்,Maaran
Advertisement
1.5

விமர்சனம்

Advertisement

தயாரிப்பு - சத்யஜோதி பிலிம்ஸ்
இயக்கம் - கார்த்திக் நரேன்
இசை - ஜிவி பிரகாஷ்குமார்
நடிப்பு - தனுஷ், மாளவிகா மோகனன், சமுத்திரக்கனி
வெளியான தேதி - 11 மார்ச் 2022
நேரம் - 2 மணி நேரம் 10 நிமிடம்
ரேட்டிங் - 1.5/5

ஓடிடியில் வெளியாகும் சில படங்களைப் பார்க்கும் போது ஒன்றே ஒன்று எழுதத் தோன்றுகிறது. படத்தை எடுத்தவர்களே, இந்தப் படங்கள் எல்லாம் தியேட்டர்களில் வெளிவந்தால் யாரும் சீண்டக் கூட மாட்டார்கள் என, ஓடிடி பக்கம் வந்த விலைக்கு விற்று விடுகிறார்கள் போலிருக்கிறது.

புதிய படம் வருகிறது, அதுவும் முன்னணி நடிகர் நடித்த படம் வருகிறது என்று படம் பார்க்க ஆர்வத்துடன் உட்காரும் சராசரி ரசிகர்கள்தான் இம்மாதிரியான படங்களைப் பார்த்து ஏமாற்றத்திற்கு ஆளாகிறார்கள். அப்படியான ஒரு படம்தான் இந்த 'மாறன்'.

'துருவங்கள் பதினாறு' என்ற வித்தியாசமான படத்தைக் கொடுத்த கார்த்திக் நரேன் தான் இந்தப் படத்தை இயக்கினாரா என்பது ஆச்சரியமாக உள்ளது. 'அசுரன்' போன்ற முன்னோடியான படங்களில் நடித்து தேசிய விருது வாங்கிய தனுஷ், இந்த மாதிரியான படங்களில் நடிக்க எப்படி நடிக்க சம்மதித்தார் என்பதும் அதிர்ச்சியாக உள்ளது.

'இன்வெஸ்டிகேட்டிவ் ஜர்னலிஸ்ட்' ஆக இருப்பவர் தனுஷ். நடைபெற உள்ள இடைத் தேர்தலில் போட்டியிடும் முன்னாள் அமைச்சர் சமுத்திரக்கனி, மின்னணு வாக்குப் பதிவு இயந்திரம் மூலம் செய்யத் திட்டமிடும் தில்லு முல்லுகளை அம்பலப்படுத்துகிறார். இந்நிலையில் தனுஷின் தங்கை ஸ்ம்ருதி வெங்கட்டை யாரோ கடத்தி கொலை செய்துவிடுகிறார்கள். சமுத்திரக்கனி தான் கடத்தி கொலை செய்திருப்பார் என சந்தேகப்படும் தனுஷ் அது பற்றி விசாரிக்க ஆரம்பிக்கிறார். அவர் உண்மையைக் கண்டுபிடித்தாரா இல்லையா என்பதுதான் படத்தின் மீதிக் கதை.

தமிழ் சினிமாவில் இது போன்ற பல கதைகளை இதற்கு முன் பார்த்திருக்கிறோம். ஆனால், இந்தப் படத்தைப் போல இப்படி ஒரு முதிர்ச்சியில்லாத ஒரு படத்தைப் பார்த்திருக்க மாட்டோம். “என்ன ஆச்சு கார்த்திக் நரேன் ?”.

இந்தப் படத்திற்கும், இந்தக் கதாபாத்திரத்திற்கும் இவ்வளவு நடிப்பு போதும் என தனுஷ், ஏதோ கடமைக்கு நடித்துக் கொடுத்து முடித்துவிட்டார். அவருக்கே இவ்வளவுதான் இன்ட்ரஸ்ட் என்னும் போது, நாம் இன்னும் என்ன சொல்வது ?.

'மாஸ்டர்' படத்திலேயே எதற்காக இவர் என கேட்க வைத்தவர் மாளவிகா மோகனன். இந்தப் படத்திலும் பெயருக்கு ஒரு கதாநாயகி என வந்து போகிறார். ஒரு காதல் காட்சி இல்லை, ஒரு டூயட் இல்லை. மாளவிகாவின் இன்ஸ்டாகிராம் போட்டோக்களுக்கு மட்டும் நாம் ரசிகர்களாக இருப்போம் என ரசிகர்கள் நினைக்கப் போகிறார்கள்.

தமிழ் சினிமாவில் ஒரு தங்கை கதாபாத்திரம் என்னவெல்லாம் செய்யுமோ அனைத்தையும் செய்கிறார் ஸ்ம்ருதி வெங்கட். தனுஷ் வீட்டின் முன் 20 வருடங்களுக்கும் மேலாக இஸ்திரி கடை வைத்திருப்பவராக மாமா ஆடுகளம் நரேன். கௌதம் மேனனை வெறுப்பேற்ற நினைத்து, அவர் நடிப்பதைப் போல, அவர் ஆங்கிலம் கலந்து பேசுவதைப் போல ஒரு இன்ஸ்பெக்டர் கதாபாத்திரத்தை வைத்திருக்கிறார் கார்த்திக் நரேன்.

முன்னாள் அமைச்சராக வில்லன் கதாபாத்திரத்தில் சமுத்திரக்கனி. இன்னும் எத்தனை படங்களில் இப்படி ஒரு கதாபாத்திரம் வரப் போகிறதோ, ஆளை விடுங்க சாமி என்றே சொல்ல வைக்கிறது. படத்தில் ஒரு டிவிஸ்ட் வேண்டுமே, அதற்காக இயக்குனர் அமீரை ஒரு கதாபாத்திரத்தில் நடிக்க வைத்திருக்கிறார்கள்.

ஜிவி பிரகாஷ்குமார் இசையில் சொல்வதற்கு ஒன்றுமில்லை. தனுஷ் எழுதி பாட ஒரு பாடலை வைக்க வேண்டும் என்று வைத்திருக்கிறார்கள்.

நேரம் போவதற்கு சினிமா பார்ப்போம் என்பார்கள், இந்தப் படத்தைப் பார்த்தால் நேரம் போகுமா என்பதும் சந்தேகம்தான்.

மாறன், மதிமாறன்… நல்லவேளை அவர்களே தெரிந்து 'மதி'யை எடுத்துவிட்டார்கள்.

 

மாறன் தொடர்புடைய செய்திகள் ↓

பட குழுவினர்

மாறன்

  • நடிகர்
  • நடிகை
  • இயக்குனர்
  • இசை அமைப்பாளர்

தனுஷ்

டைரக்டர் கஸ்தூரி ராஜாவின் 2வது மகன்தான் தனுஷ். 1984, பிப்ரவரி 25ம்தேதி பிறந்த இவரது நிஜப்பெயர் பிரபு. இவரது அண்ணன் செல்வராகவன் இயக்கத்தில் துள்ளுவதோ இளமை படத்தின் மூலம் தமிழ் சினிமாவுக்கு அறிமுகமானார். அந்த படம் வெற்றி பெற்றதைத் தொடர்ந்து மீண்டும் செல்வராகவனின் இயக்கத்தில் நடித்த காதல் கொண்டேன் படமும் சூப்பர் ஹிட் ஆனது. இதனைத் தொடர்ந்து நடித்த திருடா திருடி, தேவதையை கண்டேன், சுள்ளான், திருவிளையாடல் ஆரம்பம், குட்டி, பொல்லாதவன், உள்ளிட்ட படங்களின் மூலம் முன்னணி நடிகர் அந்தஸ்துக்கு உயர்ந்துள்ளார்.

மேலும் விமர்சனம் ↓