Dinamalar

பிளாஷ்பேக்: குறைவான நாட்களில் தயாராகி நிறைவான வெற்றியைப் பதிவு செய்த “முகராசி”

அனுபவம் என்ற ஆசான் கற்றுத் தந்த பாடத்தைப் பயின்று, மக்களின் தேவை மற்றும் அவர்களது நாடித் துடிப்பறிந்து, தனக்கென ஒரு தனிப் பாணியை வகுத்து, தான் நடிக்கும் திரைப்படங்களுக்கு என ஒரு தனித்துவமிக்க வடிவம் தந்தவர்தான் எம் ஜி ஆர். தன்னை ஒப்பந்தம் செய்ய வரும் தயாரிப்பாளர்களிடம் கதை என்ன? என்று கேட்டறிந்து, அது வெற்றி பெருமா? பெறாதா? என்று உடனே கணித்துச் சொல்லும் ஆற்றல் பெற்ற எம் ஜி ஆரை வைத்து படங்கள் தயாரிக்காத தயாரிப்பு நிறுவனங்களே இல்லை எனும் அளவிற்கு பெரும்பாலான தயாரிப்பு நிறுவனங்களின் திரைப்படங்களில் நடித்திருக்கின்றார்.

குறிப்பாக “ஆர் ஆர் பிக்சர்ஸ்”, “சரவணா பிலிம்ஸ்”, “சத்யா மூவீஸ்” போன்ற தயாரிப்பு நிறுவனங்களின் திரைப்படங்களில் அதிக எண்ணிக்கையிலான திரைப்படங்களில் நடித்திருக்கும் எம் ஜி ஆர் என்ற இந்த மூன்றெழுத்து மந்திரத்தை, சரியாக பயன்படுத்திய ஒரு தயாரிப்பு நிறுவனம் என்றால் அது “தேவர் பிலிம்ஸ்” என்று உறுதியாகச் சொல்லலாம். எம் ஜி ஆரை நாயகனாக வைத்து, ஏறக்குறைய 16 திரைப்படங்கள் வரை தயாரித்திருக்கும் இந்நிறுவனத்தின் மற்றுமொரு வெற்றித் தயாரிப்புதான் “முகராசி”.

கதாசிரியர் ஜி பாலசுப்ரமணியத்தின் “மூன்றெழுத்தில் என் மூச்சிருக்கும்” என்ற நாடகத்தை தழுவியும், 1964ம் ஆண்டு வெளிவந்த “தி பிட்டிலெஸ் த்ரீ” என்ற ஆங்கில திரைப்படத்தின் ஈர்ப்பிலும் வெளிவந்த திரைப்படம்தான் இந்த “முகராசி”. படத்தின் பூஜை அன்றே படத்தின் வெளியீட்டுத் தேதியையும் அறிவித்து, அதற்கான சரியான திட்டமிடலோடு பயணித்து, படத்தை குறித்த காலத்தில் எடுத்து முடிக்கும் ஆற்றல் பெற்ற “தேவர் பிலிம்ஸ்”, எம் ஜி ஆர் போன்ற உச்ச நட்சத்திரங்களின் திரைப்படங்கள் என வரும்போது அதன் செயல் திறன் இன்னும் பலமடங்கு உயர்ந்தே காணப்படும் என்பதற்கு ஒரு நல் உதாரணம்தான் இந்த “முகராசி” திரைப்படம்.

அதிக எண்ணிக்கையிலான எம் ஜி ஆர் திரைப்படங்கள் வெளிவந்த ஆண்டாக பார்க்கப்பட்டு வந்த 1966ம் ஆண்டு வெளிவந்த இந்த “முகராசி” திரைப்படம் வெறும் 18 நாள்களில் எடுத்து முடிக்கப்பட்ட திரைப்படமாகும். அதிலும் எம் ஜி ஆர் போன்ற உச்ச நடிகர்களை வைத்து பதினெட்டே நாட்களில் ஒரு படத்தை எடுத்து முடிப்பது என்பது அந்நாளில் சாத்தியமற்ற ஒன்று. அதை சாதித்துக் காட்டியிருந்ததோடு நின்று விடாமல், ஒரு 100 நாள் திரைப்படமாகவும் தந்து, வெற்றி பெறச் செய்திருந்தனர் “தேவர் பிலிம்ஸ்” நிறுவனத்தினர்.

மேலும் படத்தில் எம் ஜி ஆரின் அண்ணன் கதாபாத்திரத்திற்கு நடிகர் எஸ் ஏ அசோகன், நடிகர் கே பாலாஜி ஆகியோர் பரிசீலனையில் இருந்து வந்த நிலையில், நடிகர் ஜெமினி கணேசனை அந்தக் கதாபாத்திரத்திற்கு தெரிவு செய்தவர் எம் ஜி ஆர். எம் ஜி ஆருடன் நடிகர் ஜெமினி கணேசன் இணைந்து நடித்த ஒரே திரைப்படம் என்ற ஒரு தனிச் சிறப்பும் இந்த “முகராசி” திரைப்படத்திற்கு உண்டு.

• 
  ஒரே வாரத்தில் ஆயிரம் கோடி வசூல் செய்த துரந்தர் 2
• 
  போலி 'ஏஐ' வீடியோக்கள் : 'துரந்தர்' இயக்குனர் ஆதித்ய தர் எச்சரிக்கை
• 
  எனது நடிப்பில் பன்முகத் திறமையை வெளிப்படுத்த விரும்புகிறேன் : ராஜ்பால் ...
• 
  மகளை முத்தமிட்டது தவறா?: பாலிவுட் நடிகர் வேதனை
• 
  இயக்குனர் மீது 'கும்பமேளா' புகழ் மோனலிசா பாலியல் புகார்

• 
  பாலிவுட்டில் கவனம் செலுத்தும் ராஷி கண்ணா
• 
  பவிஷின் ‛லவ் ஓ லவ்' முதல்பார்வை வெளியீடு
• 
  நேரடி ஓடிடி ரிலீஸ் : விஜய் சேதுபதி நடிக்கும் காட்டான் முதல் வரிசை கட்டும் ...
• 
  ஐஸ்வர்யா ராய் பார்த்து நடிக்க ஆசைப்பட்டேன்: அபிநயா
• 
  கோவாவில் செட்டில் ஆகிறாரா ரவிமோகன்