கைதி டப்பிங்கில் நிகழ்ந்த சுவாரஸ்யம் - அர்ஜுன் தாஸ் பதிவு

கடந்த இரண்டு வருடங்களுக்கு முன் இதே நாளில் தீபாவளி ரிலீசாக வெளியானது கைதி திரைப்படம். கார்த்தி நடிப்பில் லோகேஷ் கனகராஜ் இயக்கத்தில் வெளியான இந்தப்படம் மாபெரும் வெற்றி பெற்றது. இதில் நடித்த பலருக்கும் பாராட்டுக்களையும் கவனத்தையும் பெற்றுத்தந்தது. அதில் வில்லனாக நடித்த அர்ஜுன் தாஸ், அடுத்து விஜய்யுடன் மாஸ்டர் படத்தில் நடித்து, தற்போது வசந்தபாலன் இயக்கத்தில் ஹீரோவாகவும் நடித்து வருகிறார்.

தற்போது கைதி படம் வெளியாகி இரண்டு ஆண்டுகள் ஆகியுள்ள நிலையில் இந்தப்படத்தில் டப்பிங் பேசியபோது நடைபெற்ற முக்கியமான நிகழ்வு ஒன்றை பகிர்ந்துள்ளார் அர்ஜுன் தாஸ். இந்தப்படத்தில் பயங்கரமாக சிரித்தபடி வசனம் பேசிய காட்சி ஒன்றுக்கு டப்பிங் பேசும்போது பலமுறை டேக் வாங்கியது. அதனால் இயக்குனரின் புதிய யோசனையின்படி, படத்தில் நடித்தபோது எப்படி நடித்தாரோ, அதேபோல டப்பிங் அறையிலும் கைகளை பின்னால் கட்டியவாறு மண்டியிட்து சிரித்தபடி அந்த காட்சியை நடித்தபடியே டப்பிங் பேச அது சரியாக ஒர்க் அவுட் ஆகியதாம். அந்த வீடியோவையும் தனது சோஷியல் மீடியா பக்கத்தில் பகிர்ந்துள்ளார் அர்ஜுன் தாஸ்..