கைதி வரவேற்பு : ஹிந்தி ரீமேக்கான போலாவுக்குக் கிடைக்குமா?

லோகேஷ் கனகராஜ் இயக்கத்தில், கார்த்தி, நரேன் மற்றும் பலர் நடித்து 2019ல் தமிழில் வெளிவந்து பெரும் வரவேற்பைப் பெற்ற படம் "கைதி". அப்படம் இயக்குனர் லோகேஷ் கனகராஜுக்கு ஒரு தனி அடையாளத்தைக் கொடுத்தது.

"கைதி" படக் கதையின் தொடர்ச்சியாக கமல்ஹாசன் நடித்த "விக்ரம்" படத்திலும் கதையைத் தொடர்ந்து "லோகேஷ் சினிமாட்டிக் யுனிவர்ஸ்" என ஷார்ட் ஆக "எல்சியு" என பேசப்பட்டது. தற்போது அவர் இயக்கி வரும் "லியோ" படத்திலும் அந்த "எல்சியு" இருக்கும் என எதிர்பார்க்கப்படுகிறது.

அப்படிப்பட்ட "கைதி" படத்தை ஹிந்தியில் ரீமேக் செய்து இயக்கி, கதாநாயகனாகவும் நடித்துள்ளார் அஜய் தேவகன். ஹிந்திக்காக படத்தில் நிறைய மாற்றங்களைச் செய்துள்ளார். "கைதி" படத்தில் இருந்த நரேன் கதாபாத்திரத்தை ஹிந்தியில் பெண் கதாபாத்திரமாக மாற்றி அதில் தபு நடித்துள்ளார். தமிழில் கார்த்திக்கு மனைவி கதாபாத்திரம் கிடையாது. ஹிந்தியில் மனைவி கதாபாத்திரத்தை வைத்து, அதில் அமலா பால் நடித்துள்ளார்.

இப்படத்தின் டிரைலருக்கு 47 மில்லியன் பார்வைகள் என பிரமாதமான வரவேற்பு கிடைத்துள்ளது. தமிழில் "கைதி" படத்திற்குக் கிடைத்த பெரும் வரவேற்பை விடவும் ஹிந்தி "போலா"க்குக் கிடைக்குமா என இன்னும் இரண்டு நாட்களில் தெரிந்துவிடும்.