ராப் பாடகர் ஹனி சிங்கின் ‛மேனியாக் பாடலுக்கு எதிராக நடிகை நீது சந்திரா வழக்கு

தமிழில் யாவரும் நலம், தீராத விளையாட்டுப் பிள்ளை, வைகை எக்ஸ்பிரஸ் உள்ளிட்ட சில படங்களில் நடித்தவர் பாலிவுட் நடிகை நீது சந்திரா. சமீபகாலமாக சினிமாவை விட்டு ஒதுங்கி இருக்கும் இவர் தற்போது பிரபல பஞ்சாபி ராப் பாடகர் ஹனி சிங்கிற்கு எதிராக பாட்னா உயர் நீதிமன்றத்தில் பொது நலன் சார்ந்த வழக்கு ஒன்றை கொடுத்துள்ளார்.

சமீபத்தில் யோ யோ ஹனி சிங் பாடிய மேனியாக் என்கிற பாடலில் இடம் பெற்றுள்ள வரிகள் செக்ஸ் குறித்து ஓவராக பிரதிபலிப்பதாகவும், பெண்களை ஒரு போக பொருளாக சித்தரிக்கும் விதமாகவும் உருவாகி இருப்பதாக கூறியுள்ள நீது சந்திரா இந்தப் பாடலை தடை செய்ய வேண்டும் என்றும் தனது மனுவில் குறிப்பிட்டுள்ளார்.

பஞ்சாபி பாடகரான ஹனி சிங் தனது ராப் பாடல்களுக்கான ஏராளமான ரசிகர்களை பெற்றிருந்தாலும் அடிக்கடி இது போன்று பெண்களை தவறாக சித்தரிக்கும் பாடல்கள் மூலம் சர்ச்சையில் சிக்குவதை வாடிக்கையாக வைத்துள்ளார். அந்த வகையில் கடந்த 2013ல் ஐ ஆஅம் ரேபிஸ்ட் மற்றும் 2019ல் மக்னா ஆகிய பாடல்கள் மூலம் சர்ச்சையில் சிக்கினார் என்பது குறிப்பிடத்தக்கது.