கமலுடன் புஷ்பக விமான படத்தில் நடித்த சமீர் கக்கார் காலமானார்

பாலிவுட் நடிகரான சமீர் கக்கார் உடல் நலக்குறைவால் நேற்று காலமானார். அவருக்கு வயது 71. 1985ல் இருந்து தொடர்ந்து நடித்து வந்த இவர், தொலைக்காட்சி சீரியல் மற்றும் வெப் சீரிஸ் ஆகியவற்றிலும் நடித்துள்ளார். 1987ல் இயக்குனர் சிங்கீதம் சீனிவாச ராவ் டைரக்சனில் கமல், அமலா இணைந்து நடித்த, கன்னடத்தில் உருவான புஷ்பக விமான(ம்) என்கிற படத்தில் முக்கிய கதாபாத்திரத்தில் நடித்திருந்தார்.

அந்தப் படத்தில் கமல் ஒருவரை கடத்தி வந்து தனது அறையில் வைத்து விதவிதமான சித்தரவதைகள் செய்வாரே, அந்த கதாபாத்திரத்தில் நடித்தவர் தான் இந்த சமீர் கக்கார். வசனங்களே இல்லாமல் உருவாகியிருந்த இந்த படம் தமிழில் பேசும் படம் என்கிற பெயரில் வெளியானது. கடந்த சில வாரங்களுக்கு முன்பு விஜய்சேதுபதி நடிப்பில், ஹிந்தியில் வெளியான பார்சி என்கிற வெப் சீரிஸில் கூட முக்கியமான கதாபாத்திரத்தில் சமீர் கக்கார் நடித்திருந்தார் என்பது குறிப்பிடத்தக்கது.