விமர்சனம்

தயாரிப்பு - செவ்வந்தி மூவீஸ்
இயக்கம் - கேஎல் கண்ணன்
இசை - அஷ்வின் ஹேமந்த்
நடிப்பு - விதார்த், ஷிரிதா ராவ், வம்சி
வெளியான தேதி - 14 அக்டோபர் 2022
நேரம் - 1 மணி நேரம் 58 நிமிடம்
ரேட்டிங் - 2.25/5

ஒரு கதையை சிறப்பாக யோசித்து எழுதுவதை விட அந்தக் கதையை சிறப்பாக திரைக்கதை அமைத்து, சுவாரசியமாகக் கொடுப்பதுதான் சினிமாவில் முக்கியம். இந்தப் படத்தைப் பொறுத்தவரையில் இயக்குனர் கேஎல் கண்ணன், ஒரு சென்டிமென்ட், பேன்டஸி, காதல், த்ரில்லர் என கலந்த ஒரு கதையை யோசித்திருக்கிறார். ஆனால், அதை இன்னும் விறுவிறுப்பாகவும் சுவாரசியமாகவும் கொடுத்திருந்தால் ரசிக்கும்படியாக இருந்திருக்கும்.

கார் மெக்கானிக்கான சார்லியின் ஒரே மகன் விதார்த். ஆளில்லாமல் ஓடும் காரைக் கண்டுபிடித்து அதை ஓட வைப்பதுதான் அவரது லட்சியம். அதற்காக பத்து லட்ச ரூபாய் பணம் தேவைப்படுகிறது. அந்தப் பணத்தை ஒருவரிடமிருந்து கடனாக வாங்கி வரும் போது சார்லி சாலை விபத்தில் இறந்து போகிறார். அதற்கடுத்து ஸ்கூட்டரில் செல்லும் முதியவர் ஒருவரை ஹெல்மெட் அணிந்த நான்கு பேர் தாக்கி அவரிடமிருந்த பணத்தைப் பறித்துச் செல்கிறார்கள். அவர்களை விரட்டிச் சென்று பணத்தை மீட்கிறார் விதார்த். ஆனால், அவர்கள் தப்பிவிடுகிறார்கள். தனது அப்பா சார்லியும் இப்படித்தான் கொலை செய்யப்பட்டிருப்பாரோ என்ற சந்தேகம் அவருக்கு வருகிறது. அதைப் பற்றிக் கண்டுபிடிக்கும் வேலையில் இறங்குகிறார் அதன் பின் என்ன நடக்கிறது என்பதுதான் படத்தின் மீதிக் கதை.

படத்தின் ஆரம்பக் காட்சிகள் ஒரு த்ரில்லர் படமாகவும், அதற்குப் பிறகு வரும் சார்லி - ரமா - விதார்த் காட்சிகள் சென்டிமென்ட் படமாகவும், விதார்த் - ஷிரிதா ராவ் காட்சிகள் காதல் படமாகவும், விதார்த் கண்டுபிடிக்கும் ஆளில்லாமல் ஓடும் கார் காட்சிகள் பேன்டஸி படமாகவும் இருக்குமோ என்ற ஆர்வத்தைத் தூண்டுகிறது. அந்த ஆர்வத்தை அடுத்தடுத்து பரபரப்பாக்காமல் மெதுவாக திரைக்கதையை நகர்த்தி இருக்கிறார் இயக்குனர்.

அன்பான, கொஞ்சம் அமைதியான மகனாக விதார்த். தனது லட்சியமான ஆளில்லா காரைக் கண்டுபிடிக்க முயன்று அதில் வெற்றியும் பெறுகிறார். ஆனால், அதற்கு முன்பே அப்பா சார்லியைப் பறி கொடுத்துவிடுகிறார். அப்பா மீதுள்ள பாசத்தால் அவரைது மரணத்தில் உள்ள மர்மத்தைக் கண்டுபீடிக்க ஆக்ஷன் ஹீரோவாக அவதாரம் எடுக்கிறார். இருந்தாலும் எப்போதுமே எதையோ பறி கொடுத்தவர் போல பார்வை பார்த்துக் கொண்டிருக்கிறார்.

கதாநாயகியாக ஷிரிதா ராவ். அவர் முக பாவம் காட்டி நடிப்பதை முந்திக் கொண்டு அவரது அழகான இரண்டு கண்கள் அவ்வளவு பாவத்தைக் காட்டுகிறது. காதல் காட்சிகளில் அநியாயத்திற்கு வெட்கப்படுகிறார். புதுமுகங்கள் இப்படியெல்லாம் நடிப்பது ஆச்சரியம்தான்.

சாலையில் பைக்கில் சென்று பணத்துடன் செல்பவர்களை தாக்கிப் பணம் பறிப்பது, வீடுகளுக்குள் சென்று கொள்ளையடித்து வருவது என ஹெல்மெட் அணிந்த நான்கு இளைஞர்கள் சுற்றிக் கொண்டிருக்கிறார்கள். அவர்களுக்கு தலைவனாக வம்சி. அவருடன் எப்போதும் வளைய வரும் அரை குறை ஆடை அணிந்த ஒரு பெண் என 80களின் வில்லன்களை கண் முன் நிறுத்தியிருக்கிறார் இயக்குனர். இந்தப் படத்தைப் பார்த்தால், உணவு டெலிவரி செய்ய வருபவர்களை வீட்டிற்கு வெளியே நிற்க வைத்து வாங்கி அனுப்பி விடுவார்கள். சார்லி, ரமா, விக்னேஷ்காந்த், வித்யுலேகா ஆகியோர் மற்ற நட்சத்திரங்களில் ஒரு சில காட்சிகளில் வருபவர்கள்.

மாநகரில் இத்தனை வழிப்பறி, கொள்ளை நடக்கிறது. எதன் மீதும் காவல் துறை நடவடிக்கை எடுத்தது போலவே தெரியவில்லை. படத்தில் போலீசார் வருகிறார்கள். ஆனால், அவர்கள் விதார்த்துடன் சம்பந்தப்பட்ட காட்சிகளில் மட்டுமே காட்டப்படுகிறார். நடக்கும் கொலை, கொள்ளை குற்றங்களைப் பற்றி அவர்களுக்கு எதுவுமே தெரியாது என்றே காட்டுகிறார்கள். இப்படி சில பல முக்கிய விஷயங்களை கோட்டை விட்டிருக்கிறார் இயக்குனர்.

கொளஞ்சி குமார் ஒளிப்பதிவு, அஷ்வின் ஹேமந்த் பின்னணி இசை பரவாயில்லை.

ஆற்றல் - குறைவாக…