விமர்சனம்

நடிப்பு - ரகுமான், ஹவிஸ், ரெஜினா, நந்திதா மற்றும் பலர்
தயாரிப்பு - ஸ்ரீ கிரீன் புரொடக்ஷன்ஸ்
இயக்கம் - நிசார் ஷபி
இசை - சைதன் பரத்வாஜ்
வெளியான தேதி - 5 ஜுன் 2019
நேரம் - 1 மணி நேரம் 57 நிமிடம்
ரேட்டிங் - 2.25/5

ஒரு த்ரில்லர் படமாக ஆரம்பமாகும் படம், அப்படியே காதல் படமாக மாறி, பழி வாங்கும் படமாக முடிகிறது. அறிமுக இயக்குனர் நிசார் ஷபி கதையாக நன்றாக யோசித்து எழுதியிருக்கிறார். ஆனால், அதை திரைக்கதையாக மாற்றும் போது இடைவேளை வரை பரபரப்பைக் குறைத்துவிட்டார். இடைவேளைக்குப் பின்தான் யூகிக்க முடியாத திருப்பங்களுடன் படம் நகர்கிறது. இருந்தாலும் சில நம்பமுடியாத காட்சிகள் படத்தின் தரத்தைக் குறைத்துவிடுகிறது.

இப்படத்தின் கதை என்ன என்பதைப் பார்ப்பதற்கு முன்னால் யார் யார் படத்தில் நடித்துள்ளார்கள் என்பதைத் தெரிந்து கொள்ள வேண்டும். இல்லையென்றால் படிப்பதற்கே ஒரு குழப்பம் வரும். ரகுமான் உதவி போலீஸ் கமிஷனர். ஹவிஷ் என்பவர்தான் படத்தின் நாயகன். படத்தின் திரைக்கதை வரிசைப்படி வரும் கதாநாயகிகளாக நந்திதா ஸ்வேதா, அனிஷா அம்புரோஸ், அதிதி ஆர்யா, த்ரிதா சௌத்ரி, ரெஜினா கசான்ட்ரா, புஜிதா பொன்னடா. இவர்களில் முதலில் உள்ள நால்வர் கதைப்படி ஹவிஷை தங்கள் கணவர் என்கிறார்கள். ரெஜினா, புஜிதா ஹவிஷின் காதலர்கள். ஹவிஷ் - ஆறு நாயகிகளுக்குள் என்ன தொடர்பு என்பதுதான் படத்தின் கதை.

காவல் நிலையத்திற்கு தன் கணவர் ஹவிஷைக் காணவில்லை என்று வந்து புகார் கொடுக்கிறார் நந்திதா ஸ்வேதா. கணவரைப் பற்றி அவர் உதவி கமிஷனர் ரகுமானிடம் சொல்லி வரும் போது, அதே போன்று தன் கணவர் ஹவிஷைக் காணவில்லை என்று அனிஷா அம்புரோஸ் ஏற்கெனவே புகார் கொடுத்துள்ளதாகக் கூறி அதிர்ச்சி அளிக்கிறார். ஐதராபாத்திலும் அதிதி ஆர்யா என்பவர் கணவர் ஹவிஷைக் காணவில்லை என புகார் அளித்த விவரம் ரகுமானுக்குத் தெரிய வருகிறது. சீட்டிங் கேஸில் வழக்கு பதிவு செய்து சில பல தேடல்களுக்குப் பிறகு ஹவிஷைக் கைது செய்கிறார் ரகுமான். அவரை காவல் நிலையத்தில் விசாரிக்கும் போது, தனக்கும் அந்த மூன்று பெண்களுக்கும் எந்தத் தொடர்பும் இல்லை என உறுதியாகச் சொல்கிறார் ஹவிஷ். அப்போது, நான்காவதாக த்ரிதா சௌத்ரி வந்து தன் கணவர் ஹவிஷைக் காணவில்லை என்கிறார். லாக்கப்பில் இருக்கும் ஹவிஷை ரகுமான் காட்ட, அவரைக் கொல்ல முயற்சிக்கிறார் த்ரிதா. இந்த குழப்பங்களுக்குத் தீர்வு என்ன என்பதுதான் மீதிக் கதை.

உதவி போலீஸ் கமிஷனராக ரகுமான். அவருடைய நடிப்பில் அவரது அனுபவம் பேசுகிறது. ஆனால், இந்தக் காலத்தில் எந்த ஒரு போலீஸ் அதிகாரி எப்போதும் குடித்துக் கொண்ட வழக்கு விசாரணையை மேற்கொள்கிறார். ஒரு காட்சியில் கூட அவர் யூனிபார்ம் அணியவேயில்லை.

ஆறு நாயகிகளுடன் ஜோடி போட்டு நடிக்கும் வாய்ப்பு கதாநாயகன் ஹவிஷுக்கு. நடிப்பில் ஆறு நாயகிகளும் அவரை ஓவர்டேக் செய்கிறார்கள். எல்லா காட்சிகளிலும் ஒரே மாதிரியான முகபாவத்தில் இருக்கிறார் ஹவிஷ். படத்தின் மைனஸ் பாயின்ட் இவரது நடிப்பு என தாரளமாகச் சொல்லலாம்.

ஆறு கதாநாயகிகளில் பிளாஷ்பேக்கில் வரும் ரெஜினா கசான்ட்ராவுக்குத்தான் நல்ல வாய்ப்பு. சந்திரமுகி ஜோதிகா கதாபாத்திரத்திலிருந்து இந்தக் கதாபாத்திரத்தை உருவியிருக்கிறார் இயக்குனர். ரெஜினா இதுவரை நடித்த தமிழ்ப் படங்களிலேயே இந்தப் படத்தில்தான் கதாபாத்திரத்தை உணர்ந்து நடித்திருக்கிறார். மற்ற நாயகிகளில் அனிஷா, நந்திதா, த்ரிதா ஆகியோருக்கு ஓரளவிற்கு நடிக்கவே வாய்ப்பு. அதிதி, புஜிதாவிற்கு படத்தில் பேசக் கூட வாய்ப்பு கிடையாது.

கிளைமாக்சுக்கு முன்பாக மற்ற எல்லாரையும் விட தன் இயல்பான வில்லித்தனமான நடிப்பில் படத்தை சுமக்கிறார் அந்த வயதான பாட்டி.

படத்தை இரு மொழிகளில் எடுத்திருப்பதால் சென்னை, ஐதராபாத் என மாறி மாறிக் காட்டி கதை எந்த ஊரில் நடக்கிறது என்ற குழப்பத்தை ஏற்படுத்தியிருக்கிறார்கள். தமிழ்ப் படம் பார்ப்பவர்கள் அதை சென்னை என நினைத்துக் கொள்ள வேண்டும், தெலுங்குப் படம் பார்ப்பவர்கள் அதை ஐதராபாத் என நினைத்துக் கொள்ள வேண்டும். தமிழ்நாடு பதிவு வண்டிகளும், தெலங்கானா பதிவு வண்டிகளும் அடுத்தடுத்த காட்சிகளில் மாறி மாறி ஓடிக் கொண்டிருக்கின்றன. அதனால், தமிழ்ப் படம் பார்க்கிறோமா, தெலுங்குப் படம் பார்க்கிறோமோ என்ற உணர்வு வருகிறது.

நந்திதா, அனிஷா, அதிதி ஆகியோர் ஹவிஷ் அவர்களின் கணவர் என்று புகார் கொடுத்ததன் காரணம் கடைசியில் தெரிய வரும் போது அது நம்பும்படி இல்லை.

இயக்குனரே ஒளிப்பதிவாளராக இருப்பதால் காட்சிகளை அழகான பிரேம்களில் காட்டுகிறார். ஆறு நாயகிகள் இருந்தாலும் படத்தில் கிளாமர் இல்லை என்பது ஆறுதல். நாயகிகளை கிளாமராகக் காட்ட வாய்ப்புகள் இருந்தாலும் அதைத் தவிர்த்திருக்கிறார். சைதன்யா பரத்வாஜ் இசையில் பாடல்களும், பின்னணி இசையும் சுமார்தான்.

ஸ்கிரிப்பிட்டை இன்னும் கொஞ்சம் செதுக்கியிருந்தால் இந்த செவன் சாதித்திருக்கும்.

7 (ஏழு) - இன்னும் எழுதியிருக்கலாம்...