ஏற்கனவே வெளியான படத்தலைப்பு எனது படங்களுக்கு வேண்டாம்! விஜய் முடிவு

ஏ.ஆர்.முருகதாஸ் இயக்கத்தில், விஜய் நடித்து வெளியான துப்பாக்கி படத்தின் தலைப்பு நிறைய சங்கடங்களை சந்தித்துதான் பிரச்சினையில் இருந்து மீண்டு வந்தது. அதேபோல் தற்போது விஜய்யை வைத்து படம் இயக்கும ஏ.எல்.விஜய்யும், விக்ரமைக்கொண்டு இயக்கிய தெய்வத்திருமகள், தாண்டவம் என்ற இரண்டு படங்களின் தலைப்புகளுக்காக நிறையவே போராடினார். இதில் தெய்வத்திருமகன் என்று வைத்திருந்த தலைப்பை பின்னர் தெய்வத்திருமகள் என்று மாற்ற வேண்டிய கட்டாயத்துக்கு தள்ளப்பட்டார்.

இந்தநிலையில், தற்போது விஜய்யைக்கொண்டு அவர் இயக்கி வரும் படத்துக்கு முதலில் தலைவன் என்று பெயர் வைக்க நினைத்தார். ஆனால் அந்த பெயரில் ஒரு படம் வளர்ந்து வருவதால், அடுத்து ரஜினி படத்தலைப்பான தங்கமகனை வைக்கலாம் என்று முடிவெடுத்தார். ஆனால் அதற்கு எதிர்ப்புகள் எழுந்துவிட்டது. அதனால் வேறு ரஜினி பட தலைப்பு எதையாவது வைக்கலாமே என்று டைரக்டர் ஏ.எல்.விஜய் சொன்னபோது, ஏற்கனவே வெளியான படங்களின் தலைப்பு வைக்க வேண்டாம் என்று கூறி விட்டாராம் விஜய். அதோடு, படத்திற்கான கதையை வித்தியாசமாக யோசித்த நீங்களே அதற்கு பொருத்தமான தலைப்பையும் புதிதாக யோசியுங்கள் என்று கூறி விட்டாராம். அதனால் தீவிர டைட்டீல் டிஸ்கஷனில் ஈடுபட்டுள்ள ஏ.எல்.விஜய், தனக்கு அவ்வப்போது தோன்றும் டைட்டீல்களை விஜய்யின் காதுகளுக்கு பாஸ் பண்ணி பரிசீலனையில் ஈடுபட்டிருக்கிறார்.