போராட்டத்திற்கு பின்னால் ஒரு அரசியல்...?!

மத்திய அரசு சேவை வரியை கடந்த ஆண்டு ஜூலை 1ந் தேதி முதலே அமுலுக்கு கொண்டு வந்துவிட்டது. இந்தி உள்ளிட்ட பல மொழி திரைப்படக் கலைஞர்கள் வரியை செலுத்த ஆரம்பித்து விட்டார்கள். ஆனால் தமிழ்நாட்டில் மட்டும் போராட்டம் நடப்பதற்கு பின்னால் பெரிய அரசியல் இருப்பதாக சொல்கிறார்கள். அதாவது இங்குள்ள திரைப்பட முன்னணி நடிகர்கள் மத்திய அரசுக்கு எதிராக இருப்பவர்கள் போன்று ஒரு மாயை ஏற்படுத்த நடத்தும் நாடகம் இந்த போராட்டம் என்கிறார்கள். இந்த மாயை விரைவில் வர இருக்கும் பாராளுமன்ற தேர்தலுக்கு பயன்படும் என்று கருதுகிறார்களாம். அதோடு கோடிக் கணக்கில் சம்பளம் வாங்கும் நடிகர்கள் சில லட்சத்தை வரியாக செலுத்தினால் என்ன? என்று சில முன்னணி நடிகர்கள் நினைக்கிறார்களாம். இதனால் போராட்டத்துக்கு அறிக்கை மூலம் வாழ்த்து சொல்லிவிட்டு முன்னணி நடிகர்கள் சிலர் ஒதுங்கிக் கொள்வார்கள் என்கிறது சினிமா வட்டாரம். எதுவாக இருந்தாலும் 7ம் தேதி மாலை தெரிந்து விடும்.