வெற்றியை தேடி ஓடாதீங்க... திறமையை மேம்படுத்துங்க : மனோஜ் பாஜ்பாய்

மனோஜ் பாஜ்பாய் நடித்துள்ள ஹிந்தி திரைப்படம் ‛கவர்னர் : தி சைலன்ட் சேவியர்". சின்மே டி மண்ட்லேகர் இயக்கி உள்ள இப்படத்தில் அடா சர்மா, மதுபாலா உள்ளிட்டோர் நடித்துள்ளனர். 1990களில் இந்திய அரசு எதிர்கொண்ட அரசியல் - பொருளாதார நெருக்கடியை மையமாக வைத்து இந்த படம் உருவாகி உள்ளது. வருகிற ஜூன் 12ம் தேதி படம் திரைக்கு வரும் சூழலில் இப்படம் மற்றும் திரை பயணம் குறித்து மனோஜ் பாஜ்பாய் அளித்த பேட்டி....

‛கவர்னர்" படத்தில் கவர்ந்த விஷயம் என்ன?
அமையதிான எனது கேரக்டர் தான் என்னை இதில் நடிக்க வைத்தது. பொதுவாக ஹீரோக்கள் ஆயுதம் ஏந்தி சண்டை போடுவார்கள். ஆனால் இந்தபட நாயகனோ ஞானம், பொறுமை மற்றும் பொறுப்புணர்வு ஆகியவற்றை கொண்டே போராடுகிறார். ஏனெனில் ஒரு நாட்டின் நலன் மற்றும் அதன் எதிர்காலம் ஆகியவை அவர் சார்ந்த முடிவில் தான் உள்ளது. ஒரு நடிகராக இப்படி ஒரு வேடம் கிடைப்பது அரிதான ஒன்று.

இந்த வேடத்தில் நடிக்க நீங்கள் எதிர்கொண்ட சவால்கள் என்ன?
நான்கு ஆண்டுகளுக்கு முன்பே இப்பட தயாரிப்பாளர் இந்த ரோலில் நடிக்க என்னை அணுகினார். ஒரு கவர்னரின் மனநிலையை துல்லியமாக சித்தரிப்பது எனக்கு ஒரு பெரும் பொறுப்பாக அமைந்தது. நாடு ஒரு பொருளாதார நெருக்கடியை சந்திக்கும் வேளையில், மிகுந்த அழுத்தத்திற்கு ஆளாகும் ஒரு கவர்னர், தேச நலனுக்காக சில மிக முக்கியமான முடிவுகளை எடுக்க வேண்டிய கட்டாயத்திற்கு உள்ளாவதை இத்திரைப்படம் சித்தரிக்கிறது. திரைக்குப் பின்னால் அயராது உழைக்கும் தனிநபர்களின் பங்களிப்பை இது முன்னிலைப்படுத்துகிறது. இது அவர்களுடைய கதை. எனவே, கதாபாத்திரத்தின் உடல் சார்ந்த அம்சங்களை விட, அதன் மனநிலையையும் உணர்வுபூர்வமான பயணத்தையும் புரிந்து கொள்வதிலேயே நான் அதிக கவனம் செலுத்தினேன். திரையில் ஒரு கவர்னரின் கதாபாத்திரத்தை நம்பகத்தன்மையுடனும் அழுத்தத்துடனும் வெளிப்படுத்தும் வகையில், மனரீதியாகத் தயாராவதில் நான் கணிசமான உழைப்பைச் செலுத்தினேன்.

இளம் நடிகர்களுக்கு நீங்கள் கூறும் அறிவுரை என்ன?
வெற்றியை தேடி ஓடாதீங்க, திறமையை மேம்படுத்த ஓடுங்கள். வெற்றி என்பது தற்காலிகமானது, ஆனால் திறமை என்பது வாழ்நாள் முழுவதும் உங்களுடனேயே நிலைத்திருக்கும். ஒவ்வொரு நாளும் உங்கள் நடிப்புத் திறனை மெருகேற்றுவதில் கவனம் செலுத்துங்கள், அதற்கான நற்பலன்கள் காலப்போக்கில் உங்களைத் தேடி வரும்.

இப்போதும் உங்களை ஒரு "வெளி ஆளாகவே" உணர்கிறீர்களா?
இதை நான் பலவீனமாக பார்ப்பதில்லை. ஒரு வெளியாளாக இருந்ததுதான் எனக்குள் பசி, ஆர்வம் மற்றும் மன உறுதி ஆகிய பண்புகளை வளர்த்தது. இந்தத் துறையில் நான் நிலைத்து நின்று வளர்வதற்கு அந்தப் பண்புகளே எனக்குப் பெரிதும் உதவின.

இவ்வாறு அவர் தெரிவித்தார்.