ஆர்ஆர்ஆர் படத்தில் 15 நிமிடங்கள், ஆலியா சம்பளம் இவ்வளவா ?

ராஜமவுலி இயக்கத்தில் ஜுனியர் என்டிஆர், ராம் சரண் மற்றும் பலர் நடிக்கும் படத்தில் பாலிவுட்டின் முன்னணி கதாநாயகிகளில் ஒருவரான ஆலியா பட் நடிக்கிறார். மூன்று மணி நேரப் படத்தில் ஆலியா மொத்தமாக 15 நிமிடங்கள் மட்டுமே இடம் பெறுகிறார் என டோலிவுட்டில் ஏற்கெனவே தகவல் வெளியானது. இப்படத்தின் படப்பிடிப்பில் ஆலியா 10 நாட்கள் மட்டுமே கலந்து கொண்டார். அவருடைய கதாபாத்திரம் நீட்டிக்கப்பட்ட சிறப்புத் தோற்ற கதாபாத்திரமாகவே இருக்கும் என்கிறார்கள்.

இந்த 10 நாள் படப்பிடிப்புக்கும், 15 நிமிடங்கள் படத்தில் இடம் பெறுவதற்கம் ஆலியா பட் 5 கோடி ரூபாய் சம்பளம் வாங்கியிருக்கிறார் என்று தகவல். பாலிவுட்டில் ஒரு படத்திற்காக அவர் வாங்கும் சம்பளம் 10 கோடியாம். இந்தப் படம் முக்கியமான பிரம்மாண்டமான படம், பல கோடி செலவு செய்து எடுக்கிறார்கள் என்பதால் 5 கோடி வரை கேட்டாராம்.

ஹிந்தியில் படத்தை வெளியிட அந்த நட்சத்திரங்களும் இடம் பெற வேண்டும் என்பதால் படக்குழுவும் அவர் கேட்ட சம்பளத்தைக் கொடுத்தார்களாம். ஆலியாவுக்கே அவ்வளவு சம்பளம் என்றால், படத்தில் நடித்துள்ள மற்றொரு பாலிவுட்டி நட்சத்திரமான அஜய் தேவனுக்கு எவ்வளவு சம்பளம் என்பது விரைவில் தெரிய வரும்.