Dinamalar

தனுஷின் 50வது படத்தில் இணைந்த காளிதாஸ் ஜெயராம்

பிரபல நடிகர் ஜெயராமின் மகனான காளிதாஸ் தமிழ் சினிமாவில் நலன் குமாரசாமியின் ஒரு பக்க கதை என்கிற படம் மூலமாக அறிமுகமானபோது அந்த படம் பல வருடங்களாக ரிலீஸ் ஆகாமல் இருந்த சமயத்தில் அறிமுகப்படமே இப்படியாக வேண்டுமா என்கிற பச்சாதாபம் அவர் மீது இருந்தது. ஆனால் அடுத்து வந்த சில வருடங்களில் நிலைமை அப்படியே மாறி காளிதாஸ் தற்போது தமிழில் இயக்குனர்களால் விரும்பப்படும் நடிகராக மாறிவிட்டார். குறிப்பாக பாவக்கதைகள் என்கிற ஆந்தாலஜி படத்தில் நடித்து பலரின் பாராட்டுகளை பெற்றவர், விக்ரம் படத்தில் கமலின் மகனாக நடித்து கவனம் பெற்றார்.

அதை தொடர்ந்து பா.ரஞ்சித்தின் நட்சத்திரம் நகர்கிறது படத்தில் கதாநாயகனாகவும் நடித்தார். தற்போது இந்தியன்-2 படத்தில் முக்கிய வேடத்தில் நடித்து வரும் காளிதாஸ், அடுத்ததாக தனுஷின் ஐம்பதாவது படத்திலும் இடம் பிடித்துள்ளார். தனுஷ் தானே இயக்கி நடிக்கும் அவரது ஐம்பதாவது படத்தின் அறிவிப்பு சமீபத்தில் வெளியாகி படப்பிடிப்பும் துவங்கியுள்ளது. இந்த நிலையில் படப்பிடிப்பு தளத்தில் கேரவனில் இருந்தபடி பின்னணியில் தனுஷின் புதுப்பேட்டை பாடல் ஒலிக்கும் ஒரு வீடியோ ஒன்றை வெளியிட்டு இந்த படத்தில் நடிப்பதை உறுதி செய்துள்ளார் காளிதாஸ் ஜெயராம்.

• செய்திகள்