திரிஷ்யம் 3 படத்தின் சென்சார் சான்றிதழ் வெளியானது

மலையாளத்தில் மோகன்லால் நடிப்பில் ஜீத்து ஜோசப் இயக்கத்தில் வெளியான திரிஷ்யம் திரைப்படத்தின் மிகப்பெரிய வெற்றியைத் தொடர்ந்து, அதன் இரண்டாம் பாகமும் திரிஷ்யம் 2 என்கிற பெயரில் வெளியாகி முதல் பாகத்தைப் போலவே மிகப்பெரிய வெற்றியைப் பெற்றது. தென்னிந்திய மொழிகள் தாண்டி ஹிந்தியிலும் இந்த படத்தின் இரண்டு பாகங்களும் ரீமேக் செய்யப்பட்டன.

இந்த நிலையில் தற்போது திரிஷ்யம் 3 படம் மலையாளத்தில் உருவாகியுள்ளது. வரும் மே 21 ஆம் தேதி இந்த படம் வெளியாக இருக்கிறது. சமீபத்தில் இந்த படத்தை பார்த்த தணிக்கை அதிகாரிகள் படத்திற்கு யு/ஏ 13 பிளஸ் (UA 13+) சான்றிதழ் வழங்கியுள்ளனர். படம் கிட்டத்தட்ட இரண்டு மணி நேரம் 35 நிமிடம் ஓடும் விதமாக உருவாகியுள்ளது. திரிஷ்யம் படம் இந்த மூன்றாம் பாகத்துடன் நிறைவு பெறுவதாக இயக்குனர் ஜீத்து ஜோசப் ஏற்கனவே கூறி இருந்தார் என்பது இங்கே குறிப்பிடத்தக்கது.