மீண்டும் டைரக்ஷனுக்கு திரும்பிய ஜெயம் ரவி பட இசையமைப்பாளர்

தமிழில் ஜெயம் ரவி முதன்முதலாக அவரது அண்ணன் இயக்கத்தில் அறிமுகமான ஜெயம் படத்திற்கு இசையமைத்தவர் தெலுங்கு இசையமைப்பாளர் ஆர்பி பட்நாயக். இந்த படத்தில் அனைத்து பாடல்களையும் சூப்பர் ஹிட்டாக கொடுத்தவர், அடுத்ததாக தமிழில் பெரிய அளவில் வாய்ப்புகளை பெறவில்லை. அதேசமயம் தெலுங்கில் பிஸியான இசையமைப்பாளராக வலம்வந்த இவர் 2008ல் அந்தமைனா மனசுலோ என்கிற படம் மூலம் இயக்குனராகவும் மாறினார். அதை தொடர்ந்து இசையமைப்பாளர், இயக்குனர் என இரட்டை குதிரை சவாரி செய்த அவர் மொத்தம் ஏழு படங்களை இதுவரை இயக்கியுள்ளார்.

கடைசியாக 2016ல் வெளியான மனலோ ஒக்கடு என்கிற படத்தை இயக்கியவர், தற்போது மீண்டும் டைரக்ஷனில் இறங்கி ஒரு படத்தையும் இயக்கி முடித்து விட்டார் "காபி வித் ஏ கில்லர்" டைட்டில் வைக்கப்பட்டுள்ள இந்த படத்தின் டீசரை பிரபல இயக்குனர் அனில் ரவிபுடி தற்போது வெளியிட்டுள்ளார். இந்த படத்தின் டைரக்ஷனை கவனித்துள்ளதுடன் படத்துக்கு ஆர்.பி பட்நாயக்கே இசையமைத்தும் உள்ளார்