மோகன்லாலுக்கு ஜோடியான லட்சுமி மஞ்சு

கடந்த 4 ஆண்டுகளுக்கு முன்பு மலையாளத்தில் வெளியாகி மிகப்பெரிய வெற்றியைப் பெற்ற படம் புலி முருகன். இந்த படத்தின் வெற்றியை தொடர்ந்து தற்போது இயக்குனர் வைசாக்கும் மோகன்லாலும் மீண்டும் மான்ஸ்டர் என்கிற படத்திற்காக இணைந்துள்ளனர். சமீபத்தில் இந்த படத்தின் படப்பிடிப்பு துவங்கியுள்ளது. இந்த நிலையில் இந்த படத்தின் கதாநாயகியாக லட்சுமி மஞ்சு நடிக்கிறார் என அறிவிக்கப்பட்டுள்ளது.

தெலுங்கு சீனியர் நடிகர் மோகன் பாபுவின் மகளும் நடிகையுமான லட்சுமி மஞ்சு செலக்டிவ் ஆக சில படங்களில் மட்டுமே நடித்துள்ளார். கடந்த சில வருடங்களுக்கு முன்பு தமிழில் ஜோதிகாவுடன் இணைந்து காற்றின் மொழி என்கிற படத்தில் நடித்தார் லட்சுமி மஞ்சு. இந்தநிலையில் மோகன்லாலுக்கு ஜோடியாக மான்ஸ்டர் படம் மூலம் மலையாள திரையுலகிலும் அடியெடுத்து வைக்கிறார். கடந்த ஆகஸ்ட் மாதம் படப்பிடிப்பிற்காக ஐதராபாத் சென்றிருந்த மோகன்லாலை அழைத்து தனது வீட்டில் விருந்து கொடுத்திருந்தார் மோகன்பாபு. அப்போது அவருடன் எடுத்து கொண்ட புகைப்படத்தையும் பகிர்ந்து கொண்டு இந்த தகவலை தனது சோசியல் மீடியா பக்கத்தில் தெரிவித்துள்ளார் லட்சுமி மஞ்சு.