மார்ச் வெளியீட்டிற்கு தயாராகும் நாற்காலி

மவுனம் பேசியதே, ராம், பருத்திவீரன் படங்களின் மூலம் நல்ல இயக்குனராக அறியப்பட்டவர் அமீர். எல்லா இயக்குனரையும் போன்றே அவருக்கும் நடிப்பு ஆசை வந்தது. யோகி என்ற படத்தின் மூலம் நடிகர் ஆனார். அந்த படம் நல்ல படமாக இருந்தபோதும் அது ஒரு கொரியன் படத்தின் அப்பட்டமான காப்பி என்று தெரியவந்ததால் படம் வரவேற்பை பெறவில்லை. வட சென்னை படத்தில் ஒரு முக்கியமான வேடத்தில் நடித்து பாராட்டை பெற்றார்.

இந்த நிலையில் அமீர் கதையின் நாயகனாக நடித்துள்ள நாற்காலி என்ற படம் வெளிவர இருக்கிறது. மூன் பிக்சர்ஸ் சார்பாக ஆதம் பாவா இப்படத்தை தயாரித்துள்ளார். முகவரி, காதல் சடு குடு, தொட்டி ஜெயாஉள்ளிட்ட படங்களை இயக்கிய வி.இசட்.துரை இயக்கியுள்ளார். இது ஒரு அரசியல் படம்.

அமீருடன், 555 படத்தில் நடித்த சாந்தினி ஸ்ரீதரன், ஆனந்தராஜ், ராஜ்கபூர், இமான் அண்ணாச்சி, மாரிமுத்து, சுப்பிரமணிய சிவா, சரவணஷக்தி, அர்ஜூனன் உள்ளிட்ட பலர் நடித்துள்ளனர். வித்யாசாகர் இசை அமைத்துள்ளார், கிருஷ்ணசாமி ஒளிப்பதிவு செய்துள்ளார்.

மறைந்த பாடகர் எஸ்.பி.பாலசுப்பிரமணியம் கடைசியாக இந்த படத்திற்காக "நெஞ்சமுண்டு நேர்மையுண்டு" என்ற பாடலை பாடியிருக்கிறார். இறுதிக்கட்ட பணிகள் தற்போது நடந்து வருகிறது. வரும் மார்ச் மாதம் தியேட்டரில் வெளியிட திட்டமிட்டிருக்கிறார்கள்.