பொங்கலுக்கு டபுள் ட்ரீட் தரும் தனுஷ்

விஜய்யின் "மாஸ்டர்" மற்றும் சிம்புவின் "ஈஸ்வரன்" ஆகிய இரண்டு படங்கள் பொங்கல் ரிலீசாக வெளிவர இருக்கிறது. தியேட்டர்களில் 100 சதவீத இருக்கைக்கு தமிழக அரசு அனுமதி அளித்துள்ளதைத் தொடர்ந்து, நிச்சயம் தியேட்டர்களில் கூட்டம் அலைமோதும் என எதிர்பார்க்கப்படுகிறது.

இந்நிலையில் பொங்கல் விருந்தாக செல்வராகவன் இயக்கத்தில் தனுஷ் நடிக்கும் புதிய படத்தின் டீசரும் வெளியாக இருப்பதாக தகவல்கள் வெளியாகியுள்ளது. தாணு தயாரிப்பில் உருவாகும் அப்படத்தின் டீசர் படப்பிடிப்பு தற்போது சென்னையில் உள்ள முக்கிய ஸ்டூடியோ ஒன்றில் நடைபெற்று வருவதாகத் தெரிகிறது. மேலும், இந்த டீசர் பொங்கல் தினத்தில் தியேட்டர்கள் மற்றும் இணையதளங்களில் வெளியாகும் என்றும் கூறப்படுகிறது.

ஏற்கனவே தனுஷின் "ஜகமே தந்திரம்" டிரைலர் பொங்கல் தினத்தன்று தியேட்டர்களில் ரிலீசாகும் எனக் கூறப்பட்ட நிலையில், தற்போது தனுஷின் இன்னொரு படத்தின் டீசரும் வெளியாக இருப்பதாக வெளியாகியுள்ள தகவல் தனுஷ் ரசிகர்களை மகிழ்ச்சி அடைய வைத்துள்ளது.