தமிழக முதல்வராக விஜய் பதவி ஏற்ற சில மணி நேரத்தில் நடிகர் விஷால் வைத்த கோரிக்கைகள்

தமிழக சட்டசபை தேர்தல் முடிந்து, அதிக இடங்களில் வென்ற நடிகர் விஜயின் தமிழக வெற்றிக் கழகம், ஆட்சியில் அமர்ந்தது. அக்கட்சி தலைவர் நடிகர் விஜய், இன்று முதல்வராக பொறுப்பேற்றார். அவருக்கு திரைப் பிரபலங்கள் பலரும் வாழ்த்து தெரிவித்து வரும் நிலையில், நடிகர் விஷால் சில கோரிக்கைகளை தெரிவித்துள்ளார்.

நடிகர் விஷால் வெளியிட்ட அறிக்கையில் கூறப்பட்டுள்ளதாவது: தமிழகத்தின் புதிய முதல்வராகப் பதவியேற்றுள்ள முதல்வர் விஜய்க்கு எனது மனமார்ந்த வாழ்த்துகள்! நமது திரையுலகைச் சேர்ந்த ஒரு ஆளுமை இந்த மாநிலத்தை வழிநடத்துவதைக் கண்டு மிக்க மகிழ்ச்சி அடைகிறேன். தேர்ந்தெடுக்கப்பட்ட அனைத்து சட்டசபை உறுப்பினர்களுக்கும், எதிர்கால அமைச்சர்களுக்கும் எனது நல்வாழ்த்துகள். இது நமது மாநிலத்தின் பொற்காலமாக அமையட்டும்.

​அன்புள்ள முதல்வர் விஜய் சார், கடந்த 32 ஆண்டுகளாக எனக்குத் தெரிந்த ஒருவரை, இப்போது "சார்" என்று அழைத்து பெருமை கொள்கிறேன். ஒரு வாக்காளராக உங்களிடம் நான் வைக்கும் கோரிக்கைகள் இதோ:

​பெண் காவலர்களின் நலன்: முதல்வர் தனது இல்லத்திலிருந்து தலைமைச் செயலகத்திற்குச் செல்லும்போது, வெயிலில் நீண்ட நேரம் நின்றுகொண்டிருக்கும் பெண் காவலர்களின் நிலையை நீங்கள் கவனிக்குமாறு கேட்டுக்கொள்கிறேன். அவர்களுக்குத் தேவையான நடமாடும் கழிப்பறை வசதிகளைச் செய்து தருமாறு வேண்டுகிறேன்.
​
அடிப்படை உள்கட்டமைப்பு: நிறைவேற்ற வேண்டிய வாக்குறுதிகள் பல உள்ளன. இருப்பினும், கடந்த 30 ஆண்டுகளாக மாறாமல் இருக்கும் சாலைகளைச் சீரமைப்பது, மழைநீர் தேங்குவதைத் தடுப்பது மற்றும் முறையாகச் செயல்படும் மழைநீர் வடிகால்களை உறுதி செய்வது போன்ற அடிப்படைத் தேவைகளை நீங்கள் கவனிப்பீர்கள் என நம்புகிறேன். ஒரு சாமானிய மனிதனாக இந்தப் பட்டியல் நீளும், ஆனால் இந்த அடிப்படை மாற்றங்கள் இதுவரை எந்தத் தலைவரும் செய்யாத ஒரு பெரிய தாக்கத்தை ஏற்படுத்தும்.
​மக்களுக்கு நற்பணிகள் செய்ய உங்கள் வழியில் வரும் அனைத்தையும் எதிர்கொள்ளத் தேவையான நேர்மறை எண்ணங்களையும், மனவலிமையையும் இறைவன் உங்களுக்கு வழங்கட்டும். கடவுள் உங்களை ஆசீர்வதிக்கட்டும். இவ்வாறு அதில் கூறியுள்ளார்.