ஜனாதிபதி மாளிகையில் திரையிடப்பட்ட ‛கண்ணப்பா

தெலுங்கில் உருவாகி பான் இந்திய படமாக கடந்த ஜூன் 27ம் தேதி கண்ணப்பா திரைப்படம் வெளியானது. விஷ்ணு மஞ்சு கதாநாயகனாக நடித்த இந்த படத்தை முகேஷ் குமார் சிங் என்பவர் இயக்கியிருந்தார். இதில் மோகன்லால், அக்ஷய் குமார், பிரபாஸ் உள்ளிட்ட பல பிரபலங்கள் சிறப்பு தோற்றத்தில் நடித்திருந்தனர். புராண பின்னணியில் உருவாகி இருந்த இந்த படம் ஓரளவுக்கு ரசிகர்களிடம் வரவேற்பையும், வசூலையும் பெற்றது. ஹிந்தியிலும் கூட இந்த படத்திற்கு நல்ல விலை கிடைத்துள்ளது.

இந்த நிலையில் தற்போது இந்த படம் ஜனாதிபதி மாளிகையில் சிறப்புக் காட்சியாக ராஷ்டிரபதி பவனில் திரையிடப்பட்டது. தகவல் மற்றும் ஒலிபரப்புத்துறை அமைச்சகத்தின் மூத்த அதிகாரிகள் இந்த படத்தின் சிறப்பு காட்சியை பார்த்தனர். “இதன் தெய்வீகத் தன்மையான கதை சொல்லலுக்கும் கலாச்சார பிரதிபலிப்புக்குமான மிகப்பெரிய அங்கீகாரத்தை பெற்றுள்ளது” என்று தயாரிப்பு நிறுவனம் இது குறித்த தகவலை வெளியிட்டுள்ளது.