பாட்டு பாடி, பழைய நினைவுகளை பகிர்ந்து பாரதிராஜாவை தேற்றிய கங்கை அமரன்

இயக்குனர் பாரதிராஜாவின் மகனும், நடிகருமான மனோஜ் சமீபத்தில் மாரடைப்பால் காலமானார். இவரது மறைவுக்கு திரையுலகினர் பலரும் வந்து அஞ்சலி செலுத்தினர். அதேசமயம் பாரதிராஜா குடும்பத்தினருக்கு நெருக்கமான இளையராஜா குடும்பத்தில் இருந்து இளையராஜா, கங்கை அமரன், கார்த்திக் ராஜா, யுவன் உள்ளிட்டோர் செல்லவில்லை. அதேப்போல் ரஜினி, கமல், அஜித் போன்றோரும் செல்லவில்லை.

தற்போது பாரதிராஜாவை அவரது இல்லத்தில் சந்தித்து ஆறுதல் கூறி உள்ளார் இயக்குனர் கங்கை அமரன். அப்போது பாரதிராஜாவிடம் பழைய நினைவுகளை பகிர்ந்த கங்கை அமரன், அந்தக்காலக்கட்டத்தில் அவர்கள் பணியாற்றிய சமயத்தில் நடந்த சுவாரஸ்யமான விஷயங்கள், பாடல் உருவான விதம் போன்றவற்றை பகிர்ந்தார். அதோடு சில பாடல்களையும் பாடி அந்த பாடல் வந்த விதம் பற்றியும் நினைவலைகளை பகிர்ந்தார். இதையெல்லாம் பாரதிராஜா அமைதியாக கேட்டபடி இருந்தார். இதுதொடர்பான வீடியோ ஒன்று வலைதளங்களில் வைரலானது.