
வீரதீர சூரன் படத்தில் மலையாள நடிகரின் தமிழ் உச்சரிப்பு : அசந்து போன இயக்குனர்
இது குறித்து அருண்குமார் கூறும்போது, “நான் நடிகர் சுராஜ் வெஞ்சாரமூடுவின் நடிப்புக்கு ரசிகன். இந்த படத்தில் ஒரு கதாபாத்திரத்தில் அவர் நடிக்க வேண்டும் என விரும்பி தயாரிப்பாளரிடம் கூறினேன். தயாரிப்பாளரும் அவரும் நண்பர்கள் தான். ஆனாலும் நான் சுராஜிடம் கதை சொல்ல சென்ற போது இந்த படத்தில் நான் நடிக்கிறேன்.. ஆனால் தயாரிப்பாளருக்காக அல்ல உங்களுக்காக உங்களுடைய சித்தா, பண்ணையாரும் பத்மினியும் படங்களை நான் பார்த்திருக்கிறேன் அதற்காகத்தான். இந்த படத்தின் கதையை சொல்லுங்கள் என்று அவர் கூறியதும் அவர் என்னை எவ்வளவு கவனித்திருக்கிறார் என ஆச்சரியப்பட்டேன்.
அதன்பிறகு படப்பிடிப்பு தளத்திற்கு அவர் வந்த போது முதல் நாளே மிக நீளமான வசனங்களை பேச வேண்டி இருந்தது. ஆனால் எந்த தடுமாற்றமும் இன்றி அழகான தமிழ் உச்சரிப்புடன் அவர் அந்த வசனங்களை பேசினார். நீங்கள் படம் பார்க்கும்போது கவனித்துப் பார்த்தால் உச்சரிப்புக்கும் உதடுகளின் அசைவிற்கும் எந்த வித மாற்றமும் தெரியாது. அதற்கு காரணம் அவர் படத்தின் வசனங்களை முன்கூட்டியே என்னிடம் வாங்கிக் கொண்டு தனக்கென ஒரு மொழிபெயர்ப்பு உதவியாளரை வைத்துக் கொண்டு வசனங்களை பேச பக்காவாக தயாராகித்தான் படப்பிடிப்பிற்கே வந்தார். நிச்சயமாக இந்த படத்தை தொடர்ந்து அவர் தமிழில் மிகப்பெரிய ரவுண்டு வருவார் என்பது உறுதி” என கூறியுள்ளார் அருண்குமார்.




















வாசகர்கள் கருத்துகள்
முதல் நபராக கருத்து தெரிவியுங்கள்!