ப்ளூ ஸ்டோரி ஆக மாறுகிறதா எல்ஐசி படத் தலைப்பு?

விக்னேஷ் சிவன் இயக்கத்தில், அனிருத் இசையமைப்பில், பிரதீப் ரங்கநாதன், எஸ்ஜே சூர்யா, கிரித்தி ஷெட்டி, யோகி பாபு மற்றும் பலர் நடிக்க கடந்த வருடக் கடைசியில் அறிவிக்கப்பட்ட படம் "லவ் இன்சூரன்ஸ் கார்ப்பரேஷன்". இப்படத்தை சுருக்கமாக "எல்ஐசி" என குறிப்பிட்டனர் படக்குழுவினர். இந்த வருடம் ஜனவரி மாதத்தில் படப்பிடிப்பு ஆரம்பமாகி நடைபெற்று வருகிறது.

"எல்ஐசி" என்ற தலைப்பு தான் பதிவு செய்து வைத்த தலைப்பு என இயக்குனரும், இசையமைப்பாளருமான எஸ்எஸ் குமரன் ஒரு சர்ச்சையை ஏற்படுத்தினார். அதன்பின் எல்ஐசி நிறுவனமும் இத்தலைப்பை பயன்படுத்தக் கூடாது என நோட்டீஸ் ஒன்றை வெளியிட்டது.

இருந்தாலும் படக்குழுவினர் படத்தின் தலைப்பு குறித்து இதுவரை எதுவும் தெரிவிக்காமல் இருந்தனர். இந்நிலையில் படத்திற்கு "ப்ளூ ஸ்டோரி" என்று தலைப்பு வைத்துள்ளதாகத் தகவல் வெளியாகி உள்ளது. இரண்டு நாட்களில் இதன் அறிவிப்பு வெளியாகலாம் என்கிறார்கள்.