சுதீப் ஸ்டைலில் முடி வெட்டி விடாதீங்க : சலூன் கடைக்காரருக்கு தலைமை ஆசிரியர் கடிதம்

சினிமா பிரபலங்கள் அணியும் உடைகள் மட்டுமின்றி அவர்களின் ஹேர்-ஸ்டைல், தாடி, மீசை போன்றவையும் ரசிகர்கள் மத்தியில் டிரெண்ட் ஆகும். அந்தவகையில் 2017ல் கன்னடத்தில் சுதீப், அமலாபால் நடித்து வெளியான படம் ‛ஹெப்புலி". இதில் சுதீப் வித்தியாசமான ஹேர்ஸ்டைலில் வலம் வந்தார். இந்தபடம் வெளியாகி 6 ஆண்டுகள் ஆன பின்பு கூட இப்போது அவரின் ஹேர்ஸ்டைலை பலர் பின்பற்றுகின்றனர்.

இந்நிலையில் கர்நாடக மாநிலம், குளஹெள்ளியில் உள்ள அரசு பள்ளி ஒன்றின் தலைமை ஆசிரியர் சிவாஜி நாயக் என்பவர் அந்த பகுதியில் உள்ள சலூன் கடை ஒன்றுக்கு கடிதம் எழுதி உள்ளார். அதில், ‛‛தயவு செய்து மாணவர்களுக்கு ‛ஹெப்புலி" படத்தில் வரும் சுதீப் ஸ்டைலில் முடி திருத்தம் செய்ய வேண்டாம். இதனால் மாணவர்கள் படிப்பில் கவனம் செலுத்த மறுக்கின்றனர்"" என வேண்டுகோள் விடுத்துள்ளார். அதை ஏற்ற சலூன் கடை உரிமையாளர், மாணவர்களுக்கு இனி அவ்வாறு முடிவெட்ட மாட்டோம் என்று தெரிவித்துள்ளார்.

தலைமை ஆசிரியரின் இந்த வேண்டுகோள் கடிதம் சமூக வலைதளங்களில் வைரலானது.