
வாரிசு படத்தையும் வலுவாக வளைத்துப் போட்ட ரெட் ஜெயன்ட்
அதே பொங்கலுக்கு விஜய் நடித்துள்ள "வாரிசு" படத்தின் தமிழக வினியோக உரிமையை விஜய் நடித்த "மாஸ்டர்" படத்தைத் தயாரித்த, அடுத்து விஜய்யின் 67வது படத்தைத் தயாரிக்க உள்ள செவன் ஸ்க்ரீன் ஸ்டுடியோ நிறுவனம் வாங்கியது. இருப்பினும் அந்நிறுவனத்திடமிருந்து சில முக்கிய ஏரியாக்களை ரெட் ஜெயன்ட் மூவிஸ் நிறுவனம் வாங்கும் என்ற பேச்சு கோலிவுட்டில் இருந்தது.
இந்நிலையில் இன்று(டிச., 17) "வாரிசு" படத்தின் தமிழக வினியோகஸ்தர்கள் யார் யார் என்பதை ஏரியா வாரியாக செவன் ஸ்க்ரீன் ஸ்டுடியோ நிறுவனம் அறிவித்துள்ளது. அதன்படி முக்கிய ஏரியாக்களான சென்னை, செங்கல்பட்டு, வட ஆற்காடு, தென்னாற்காடு, கோவை ஆகிய ஏரியாக்களின் உரிமையை ரெட் ஜெயன்ட் நிறுவனம் வாங்கியுள்ளது. தமிழகத்தில் இந்த ஏரியாக்களில்தான் தியேட்டர்கள் அதிகம்.
கடந்த சில வாரங்களாக "வாரிசு, துணிவு" இடையேயான போட்டியில் இந்த வினியோக விஷயமும் பரபரப்பை ஏற்படுத்தியிருந்தது. "துணிவு" படத்தை ரெட் ஜெயன்ட் மூவீஸ் நிறுவனம் முன்னரே வாங்கிவிட்டதால், "வாரிசு" படத்தை 5 முக்கிய ஏரியாக்களில் மட்டும் வளைத்துப் போட்டிருக்கிறது என்று கோலிவுட்டில் பேசிக் கொள்கிறார்கள்.
"துணிவு" படத்தை ரெட் ஜெயன்ட் வெளியிடுவதால் "வாரிசு" படத்திற்கு அதிகத் தியேட்டர்கள் கிடைக்க வாய்ப்பில்லை என அதன் தயாரிப்பாளர் தில் ராஜு ஒரு பேட்டியில் பேசியுள்ள நிலையில் இப்போது 5 ஏரியாக்களை ரெட் ஜெயன்ட் வாங்கியுள்ளது ரசிகர்களிடத்திலும் பரபரப்பை ஏற்படுத்தியுள்ளது. "வாரிசு, துணிவு" இரண்டு படங்களும் சமமான அளவில் தியேட்டர்களில் வெளியாகும் என்று தெரிகிறது.





















வாசகர்கள் கருத்துகள்
முதல் நபராக கருத்து தெரிவியுங்கள்!