பில்கேட்சை சந்தித்த மகேஷ்பாபு

தெலுங்கு சினிமாவின் பிரின்ஸ் என்று அழைக்கப்படுகிறவர் மகேஷ்பாபு. இவர் நடித்த சர்காரு வாரிபட்டா படம் சமீபத்தில் வெளியானது. படம் பற்றிய விமர்சனங்கள் பலவிதமாக இருந்தாலும் வசூலை குவித்து தயாரிப்பாளர்களுக்கு லாபம் கொடுத்தது. அடுத்ததாக திரிவிக்ரம் ஸ்ரீனிவாஸ் இயக்கும் படத்தில் நடிக்கிறார். அதன்பிறகு ஷங்கர் இயக்கும் படத்தில் நடிக்கிறார்.

தற்போது கிடைத்துள்ள இடைவெளியில் குடும்பத்துடன் அமெரிக்காவுக்கு சுற்றுலா சென்றுள்ளார் மகேஷ் பாபு. இந்த சுற்றுலாவின் ஒரு பகுதியாக அவர் மைக்ரோசாப்ட் நிறுவனர் பில்கேட்ஸை சந்தித்துள்ளார். பில் கேட்ஸ், மகேஷ் மற்றும் அவரது மனைவி நம்ரதா ஷிரோத்கர் ஆகியோர் இணைந்து எடுத்துக் கொண்ட புகைப்படத்தை வெளியிட்டுள்ள மகேஷ் பாபு, "மிஸ்டர். பில் கேட்ஸைச் சந்தித்ததில் மகிழ்ச்சி! இந்த உலகம் கண்ட மிகப் பெரிய தொலைநோக்கு பார்வையாளரில் ஒருவர், மிகவும் பணிவானவர், உண்மையிலேயே அவர் ஒரு உத்வேகம்" என்று குறிப்பிட்டிருக்கிறார்.