நேரடியாக ஓடிடி-க்குப் போன மகா சமுத்திரம்

அஜய் பூபதி இயக்கத்தில், சைதன் பரத்வாஜ் இசையமைப்பில், ஷர்வானந்த், சித்தார்த், அதிதி ராவ் ஹைதிரி, அனு இம்மானுவேல் மற்றும் பலர் நடித்த படம் "மகா சமுத்திரம்". தமிழ், தெலுங்கில் தயாரானதாக சொல்லப்பட்ட இப்படத்தின் தெலுங்கு பதிப்பை கடந்த மாதம் அக்டோபர் 14ம் தேதி தியேட்டர்களில் வெளியிட்டனர். ஆனால், படம் எந்த ஒரு வரவேற்பையும் பெறாமல் படுதோல்வி அடைந்தது.

தெலுங்கில் அப்படிப்பட்ட ஒரு ரிசல்ட் வந்ததால் தமிழில் படத்தைத் தியேட்டர்களில் வெளியிடாமல் நேரடியாக ஓடிடி தளத்தில் இன்று வெளியிட்டுள்ளனர். இது பற்றிய அறிவிப்பை படத்தை நெட்பிளிக்ஸ் இந்தியா அதிகாரப்பூர்வமாக வெளியிட்டுள்ளது. இப்படி இரண்டு மொழிகளில் எடுத்து ஒரு மொழியை தியேட்டர்களிலும், மற்றொரு மொழியை ஓடிடி தளங்களிலும் வெளியிட்டுள்ளது திரையுலகத்தில் ஆச்சரியமாகப் பார்க்கப்படுகிறது.

ஒரு மொழியில் தோல்வியுற்றதால் மற்றொரு மொழியிலும் வெளியிட்டு மீண்டும் ஒரு தோல்வியைச் சந்திக்காமல் தயாரிப்பாளர் தன்னை காப்பாற்றிக் கொண்டார் என்பதே உண்மை என்கிறார்கள் கோலிவுட்டில்.