ஷம்முவின் போனை திருடிய நண்பர் : பார்சலில் பக்குவமாக திருப்பி அனுப்பினார்

தமிழ் சினிமாவில் துணை நடிகையாக இருப்பவர் ஷாலு ஷம்மு. நடிப்பது குறைவென்றாலும் சமூக வலைத்தளங்களில் பிசியாக இருப்பவர். தனது ஆண் நண்பர்களுடன் நெருக்கமாக இருந்து அதனை வீடியோவாக எடுத்து பதிவிட்டு தனக்கென்று தனி ரசிகர்களை வைத்திருப்பவர்.

அண்மையில் நட்சத்திர ஓட்டல் பார்ட்டி ஒன்றில் ஆட்டம்போட்டுவிட்டு தனது தோழி வீட்டில் இரவு தங்கி விட்டு காலையில் எழுந்து வீட்டுக்கு சென்றிருக்கிறார். அப்போதுதான் தனது போனை காணவில்லை என்பதை அறிந்திருக்கிறார். நட்சத்திர ஓட்டல், நண்பர்களிடம் தேடிவிட்டு கடைசியாக போலீசில் புகார் அளித்தார். போலீசார் நண்பர்களிடம் விசாரித்து வரும் நிலையில் தற்போது போன் கிடைத்து விட்டதாக கூறியிருக்கிறார்.

போனுடன் இருக்கும் படத்தை தனது இன்ஸ்டாகிராமில் வெளியிட்டு "எனது ஐபோன் கிடைத்துவிட்டது. எனது வீட்டுக்கு ஒரு பார்சல் வந்தது. அந்த பார்சலில் காணாமல் போன ஐபோன் இருந்ததை பார்த்து அதிர்ச்சி அடைந்தேன். யார் மீது நான் சந்தேகப்பட்டேனோ அவர்தான் எனது ஐபோனை திருடி உள்ளார். 8 வருட நட்பு வீணாகி விட்டது. யாரை நம்புவது என்று தெரியவில்லை. இனி யாரையும் நம்பமாட்டேன்"" என்று கூறியுள்ளார்.