டிவியிலும் ஏமாற்றிய ராதே ஷ்யாம்

பிரபாஸ், பூஜா ஹெக்டே மற்றும் பலர் நடிக்க தெலுங்கில் உருவாகி ஐந்து மொழிகளில் வெளியான பிரம்மாண்டமான படம் "ராதேஷ்யாம்". சுமார் 300 கோடி ரூபாய் செலவில் தயாரான இந்தப் படம் எந்த மொழிகளிலும் வெற்றி பெறாமல் பெரும் தோல்வியைத் தழுவியது. 150 கோடி ரூபாய் மட்டுமே வசூலித்து 150 கோடி வரையில் நஷ்டத்தை ஏற்படுத்தியது.

இப்படத்தைக் கடந்த வாரம் தெலுங்கில் டிவியில் முதல் முறை ஒளிபரப்பு செய்தார்கள். தியேட்டர்களுக்கு மக்கள் வராமல் ஏமாற்றியதைப் போல டிவியிலும் படத்தைப் பார்க்க மக்கள் விரும்பவில்லை போலிருக்கிறது. வெறும் 8.25 டிவி ரேட்டிங்கை மட்டுமே இந்தப் படம் பெற்றது. டிவியில் கூட இந்தப் படத்திற்கு வரவேற்பு இல்லை என்பது பிரபாஸ் ரசிகர்களுக்கு அதிர்ச்சியைக் கொடுத்துள்ளது.

தெலுங்கில் இரண்டாம், மூன்றாம் நிலை நடிகர்களின் படங்கள் கூட முதல் முறை ஒளிபரப்பில் இதை விட அதிகமான ரேட்டிங்கைப் பெற்றுள்ளது. தெலுங்கில் இதுவரை டிவியில் ஒளிபரப்பான படங்களில் அல்லு அர்ஜுன், பூஜா ஹெக்டே நடித்த "அலா வைகுந்தபுரம்லோ" படம் 29.4 டிவி ரேட்டிங்குடன் முதலிடத்தில் உள்ளது.