மமிதா பைஜுக்கு அடுத்தடுத்து 4 படங்கள் ரிலீஸ்

தமிழ் சினிமாவில் இப்போதைய இளம் நடிகையரில் முன்னணி நடிகை என்றால் அது மமிதா பைஜு தான். இந்த வருடத்திலேயே அடுத்தடுத்து அவருக்கு 4 படங்கள் வெளியாக உள்ளன. நான்கு படங்களுமே முக்கியமான படங்கள்தான்.

இந்த வருடத்தில் அவரது முதல் தமிழ்ப் படமான விஜய்யுடன் நடித்த "ஜனநாயகன்" படம் வந்திருக்க வேண்டும். ஆனால், அது தள்ளிப் போய்க் கொண்டே இருக்கிறது. எப்படியும் மே மாதத்தில் அந்தப் படம் வெளிவந்துவிடும்.

அதனால், முதல் படமாக ஏப்ரல் 30ம் தேதி தனுஷ் ஜோடியாக நடித்துள்ள "கர" படம் வெளியாக உள்ளது. இந்தப் படத்தில் மாறுபட்ட கதாபாத்திரத்தில் அவர் நடித்துள்ளாராம். படம் பற்றிய எதிர்பார்ப்பும் அதிகமாகவே உள்ளது. எனவே, இந்த வருடத்தில் தனது வெற்றிக் கணக்கை அவர் "கர" மூலம் ஆரம்பித்து வைப்பார் என்கிறார்கள்.

அதற்கடுத்து விஷ்ணு விஷால் ஜோடியாக நடித்துள்ள "இரண்டு வானம்" படம் வெளிவரலாம். இந்தப் படத்திலும் வித்தியாசமான கதாபாத்திரத்தில்தான் நடித்துள்ளாராம்.

நான்காவது படமாக சூர்யா ஜோடியாக நடித்துள்ள "விஸ்வநாத் அண்ட் சன்ஸ்" படம் வெளிவர உள்ளது. ஒரே ஆண்டில் இப்படி நான்கு முக்கியப் படங்களில் நடித்துள்ள மமிதா பைஜு இவற்றின் மூலம் நல்ல நடிகை என்ற பெயர் எடுக்கும் அளவிற்கு அந்தப் படங்களில் கதாபாத்திரங்கள் அமைந்துள்ளது என்பதுதான் கூடுதல் தகவல்.