நானே வருவேன் டீசருக்கு வரவேற்பு எப்படி?

செல்வராகவன் இயக்கத்தில், யுவன்ஷங்கர் ராஜா இசையமைப்பில், தனுஷ், இந்துஜா, எல்லி அவ்ர்ரம், பிரபு மற்றும் பலர் நடிக்கும் "நானே வருவேன்" படத்தின் டீசர் நேற்று தமிழ், தெலுங்கு மொழிகளில் யு டியூபில் வெளியானது.

“காதல் கொண்டேன், புதுப்பேட்டை” படங்களுக்குப் பிறகு 16 வருடங்கள் கழித்து செல்வராகவன், யுவன், தனுஷ் கூட்டணி மூன்றாவது முறையாக இந்தப் படம் மூலம் இணைந்துள்ளது. அதனால், இப்படம் பற்றி ரசிகர்களிடம் ஒரு எதிர்பார்ப்பு உள்ளது.

நேற்றைய டீசரைப் பார்க்கும் போது தனுஷ் இரு வேடங்களில் நடிப்பது, அதில் ஒரு தனுஷ் சைக்கோ வில்லன், மற்றொரு தனுஷ் நாயகன் என்றும் மட்டும் ஓரளவிற்கு புரிந்து கொள்ள முடிகிறது. தற்போது யு-டியூப் டிரென்டிங்கில் தமிழ் டீசர் முதலிடத்தில் உள்ளது. டீசர் வெளியாகி 24 மணி நேரத்திற்குள்ளாக 27 லட்சம் பார்வைகளைக் கடந்துள்ளது. தெலுங்கில் 7 லட்சம் பார்வைகளைக் கடந்துள்ளது.

இப்படம் இந்த மாதம் 29ம் தேதி வெளியாகும் என்று தெரிகிறது. ஆனாலும், டீசரில் பட வெளியீட்டுத் தேதி பற்றி எதுவும் குறிப்பிடவில்லை.