பிளாஷ்பேக்: இரட்டை சகோதரிகளாக நடித்த மாதுரி தேவி

1940களுக்கு முன்பு நடிகர்கள் இரட்டை சகோதரர்களாக நடித்திருக்கிறார்கள். "உத்தம புத்திரன்" படத்தில் பி.யு.சின்னப்பா நடித்தார். ஆனால் நடிகை இரட்டை வேடத்தில் நடித்த முதல் படம் "லட்சுமி விஜயம்". பொன்முடி, மந்திரி குமாரி போன்ற படங்களில் நடித்து புகழ்பெற்ற மாதுரி தேவி இரட்டை வேடங்களில் நடித்தார். பொம்மன் இராணி இயக்கிய இந்த படத்தில் பி.எஸ்.கோவிந்தன், பந்துலு, சந்தானலட்சுமி, காளி என்.ரத்தினம் உள்ளிட்ட பலர் நடித்திருந்தனர். ஜி.ராமநாதன் இசை அமைத்திருந்தார், ஜி.ரங்கநாதன் ஒளிப்பதிவு செய்திருந்தார்.

ஒரு ராஜாவுக்கு அமுதா, குமுதா என இரட்டை பெண் குழந்தைகள் பிறக்கிறார்கள். பிற்காலத்தில் ராஜ்யத்தை ஆளுவது யார் என்ற வாரிசு சண்டை வந்து விடக்கூடாது என்பதற்காக ஒரு குழந்தை அமுதாவை காட்டுக்கு அனுப்பி முனிவர்களை கொண்டு வளர்க்கிறார். குமுதா அரண்மனையில் வளர்க்கப்படுகிறார். ஆனால் உரிய பருவத்தில் இருவருக்கும் மோதல் உருவாகிறது. அது எப்படி அதன் முடிவு என்ன என்பதுதான் படத்தின் கதை.