பகைவனுக்கு அருள்வாய் படத்தில் முன்னாள் கைதிகள்

திருமணம் எனும் நிக்காஹ் படத்திற்கு பிறகு அனீஸ் இயக்கி உள்ள படம் பகைவனுக்கு அருள்வாய். சசிகுமார், பிந்து மாதவி, வாணி போஜன், ஹரிஷ் பெரடி, ஜெயபிரகாஷ் உள்பட பலர் நடிக்கிறார்கள். ஜிப்ரான் இசை அமைக்கிறார், கார்த்திக் தில்லை ஒளிப்பதிவு செய்கிறார்.

படத்தை பற்றி அனீஸ் கூறியதாவது: திருமணம் எனும் நிக்காஹ் படத்திற்காக நிறைய ஆய்வுகள் செய்து சைவத்தையும், இஸ்லாத்தையும் இணைத்து அந்த படத்தை இயக்கினேன். அதேபோன்று சிறைச்சாலைகள் குறித்து பல ஆய்வுகள் செய்து சிறைச்சாலைகளின் இன்னொரு முகத்தை பதிவு செய்திருக்கிறேன். பகைவனுக்கு அருள்வாய் என்கிற பாரதியாரின் அறிவுரையை கேட்டு நடந்தால் சிறைச்சாலைகளுக்கு அவசியம் இருக்காது என்பதுதான் படம் சொல்லும் கருத்து.

இந்த படத்தின் சிறப்பு அம்சம் என்னவென்றால் முக்கிய கேரக்டர்களில் சிறையில் வாழ்ந்த முன்னாள் கைதிகள் நடித்திருக்கிறார்கள். பிரபல கன்னட நடிகர் சதீஷ் நீனான்சம் தமிழில் அறிமுகமாகிறார். அனன்யா என்கிற 9 வயது சிறுமி பாடல்கள் எழுதியிருக்கிறார். கொரோனா காலம் முடிந்ததும் படம் தியேட்டரில் வெளியாகும். என்றார்.