2026ல் எதிர்பார்க்கப்படும் படங்கள் : வசூல் சாதனை புரியுமா ?

2025ம் ஆண்டில் 280க்கும் மேற்பட்ட படங்கள் தியேட்டர்களில் வெளியாகின. அவற்றில் கூலி படம் மட்டும்தான் 500 கோடி வசூலைக் கடந்தது. 2025ஐப் பொறுத்தவரையில் தமிழ் சினிமாவில் பெரிய வசூல் சாதனை என்பது நிகழவில்லை. 100 கோடி வசூலைக் கடந்த படங்களின் எண்ணிக்கையும் குறைவாகவே இருந்தது. சில சிறிய படங்கள்தான் ரசிகர்களின் வரவேற்பைப் பெற்று வசூலிலும் சாதனை படைத்தது.

2025ம் ஆண்டு ஆரம்பமாகும் போது இந்த ஆண்டில் அனைத்து முன்னணி நடிகர்களின் படங்களும் வெளியாகும் என்று எதிர்பார்க்கப்பட்டது. ஆனால், விஜய் படம் தவிர ஏறக்குறைய அனைத்து முன்னணி நடிகர்களின் படங்களும் வெளிவந்தது. 2026ம் ஆண்டில் விஜய் படம்தான் முதலில் வரப் போகிறது. அதுவே அவரது கடைசி படமாகவும் அமையப் போகிறது. அதோடு போட்டியாக சிவகார்த்திகேயன் நடித்துள்ள "பராசக்தி" படமும் வருகிறது. அந்தப் படங்கள் தவிர அடுத்த ஆண்டில் எதிர்பார்க்கப்படும் படங்களாக சில படங்கள் ரசிகர்களாலும், திரையுலகினராலும் பார்க்கப்படுகிறது.

ஜனநாயகன்

எச்.வினோத் இயக்கத்தில், அனிருத் இசையமைப்பில், விஜய், பூஜா ஹெக்டே, மமிதா பைஜு மற்றும் பலர் நடித்துள்ள படம் ஜனநாயகன். தெலுங்கில் பாலகிருஷ்ணா நடித்து வெளிவந்த "பகவந்த் கேசரி" படத்தின் ரீமேக்காக இருக்குமோ என்ற சந்தேகம் உள்ளது. ஆனால், அதன் கதைக் கருவை மட்டும் எடுத்துக் கொண்டதாகச் சொல்கிறார்கள். விஜய்யின் கடைசி படம் என்பதால் இந்தப் படம் மீதான எதிர்பார்ப்பு இயல்பாகவே அதிகமாக உள்ளது. பொங்கல் விடுமுறை என்பதால் எப்படி இருந்தாலும் படம் ஓடிவிடும் என்ற நம்பிக்கை திரையுலகில் உள்ளது.

பராசக்தி

சுதா கொங்கரா இயக்கத்தில், ஜிவி பிரகாஷ்குமார் இசையமைப்பில், சிவகார்த்திகேயன், ரவி மோகன், அதர்வா, ஸ்ரீலீலா மற்றும் பலர் நடித்துள்ள படம். 1960களில் தமிழகத்தில் நடந்த ஹிந்தி எதிர்ப்புப் போராட்டத்தை மையமாக வைத்து அண்ணன், தம்பி இடையிலான பாசக் கதையாக இப்படத்தை எடுத்திருப்பதாகச் சொல்கிறார்கள். விஜய்யின் கடைசி படமான "ஜனநாயகன்" இப்படத்திற்கான பெரும் சவால். அந்தப் படம் நன்றாக அமைந்துவிட்டதால் இந்தப் படம் தாக்குப் பிடிக்குமா என்பது கொஞ்சம் சந்தேகமே என்று திரையுலகிலேயே சொல்கிறார்கள்.

மேலே குறிப்பிட்ட இரண்டு படங்கள்தான் 2026ம் வருடத்தின் வெளியீட்டிற்காக அதிகாரப்பூர்வமாக அறிவிக்கப்பட்ட முக்கிய படங்கள். மற்ற படங்களுக்கான வெளியீட்டுத் தேதிகள் இன்னும் அறிவிக்கப்படவில்லை என்றாலும் அதில் சில முக்கிய படங்களைப் பற்றிப் பார்ப்போம்.

ஜெயிலர் 2

நெல்சன் இயக்கத்தில், அனிருத் இசையமைப்பில், ரஜினிகாந்த், எஸ்ஜே சூர்யா, ரம்யா கிருஷ்ணன் மற்றும் பலர் நடிக்கும் படம். 2023ல் வெளிவந்து பெரிய வெற்றி பெற்ற "ஜெயிலர்" படத்தின் இரண்டாம் பாகமாக உருவாகி வரும் இப்படம் ஜுன் மாதம் வெளியாகும் என்று எதிர்பார்க்கப்படுகிறது. முதல் பாகத்தைப் போலவே இந்த இரண்டாம் பாகமும் வெற்றி பெறலாம் என்ற எதிர்பார்ப்பு உள்ளது. தமிழ் சினிமாவின் 1000 கோடி கனவை இந்தப் படம் பூர்த்தி செய்யுமா என்பது ரஜினி ரசிகர்களின் எதிர்பார்ப்பாக உள்ளது.

கருப்பு

ஆர்ஜே பாலாஜி இயக்கத்தில், சாய் அபயங்கர் இசையமைப்பில், சூர்யா, த்ரிஷா மற்றும் பலர் நடிக்கும் படம். 2025ம் வருடமே இப்படம் வெளியாகும் என்று எதிர்பார்க்கப்பட்டது. 2025 ஜுலை மாதத்திலேயே இப்படத்தின் டீசரை வெளியிட்டார்கள். தீபாவளிக்கு வெளியாகும் என்று எதிர்பார்க்கப்பட்ட படம். ஆனால், சில பல காரணங்களால் படத்தின் வெளியீடு 2026ல் நடக்க உள்ளது. தியேட்டர் வெளியீட்டில் தொடர் தோல்விகளைத் தழுவி வரும் சூர்யாவை இந்த "கருப்பு" தான் காப்பாற்ற வேண்டும்.

இந்தப் படத்தை அடுத்து வெங்கி அட்லூரி இயக்கத்தில் சூர்யாவின் 46வது படமும் 2026ம் ஆண்டில் வெளியாகிவிடும். விரைவில் இப்படத்தின் தலைப்பு அறிவிக்கப்படலாம்.

சர்தார் 2

மித்ரன் இயக்கத்தில், சாம் சிஎஸ் இசையமைப்பில், கார்த்தி, எஸ்ஜே சூர்யா, மாளவிகா மோகனன், ஆஷிகா ரங்கநாத், ரஜிஷா விஜயன் மற்றும் பலர் நடிக்கும் படம். இந்தப் படத்தின் படப்பிடிப்பு எப்போதோ முடிந்துவிட்டது. 2025ம் ஆண்டிலேயே வெளியாக வேண்டிய படம். 2025 மார்ச் மாதத்தில் இப்படத்தின் வீடியோ முன்னோட்டம் வெளியானது. கடந்த சில மாதங்களாகவே இந்தப் படம் குறித்த எந்த அப்டேட்டும் வெளியாகவில்லை. 2022ல் வெளிவந்த இப்படத்தின் முதல் பாகம் 100 கோடி வசூலைப் பெற்ற வெற்றிப் படம். ஒரு வெற்றிப் படத்தின் இரண்டாவது பாகத்தை வெளியிட இவ்வளவு தாமதம் கூடாது.

இந்தப் படம் தவிர கார்த்தி நடித்து டிசம்பர், 2025ல் வெளிவர வேண்டிய "வா வாத்தியார்", அவர் தற்போது நடித்து வரும் "மார்ஷல்" ஆகிய படங்கள் 2026ம் ஆண்டில் அடுத்தடுத்து வெளியாகலாம்.

டிரைன்

மிஷ்கின் இயக்கம், இசையமைப்பில், விஜய் சேதுபதி, ஸ்ருதிஹாசன், நாசர் மற்றும் பலர் நடிக்கும் படம். இப்படம் பற்றி கடந்த சில மாதங்களாக எந்த சத்தமும் இல்லாமல் இருந்தது. கடந்த வாரத்தில் திடீரென இப்படத்தின் முதல் சிங்கிளை வெளியிட்டார்கள். அடுத்த சில வாரங்களில் இப்படத்தின் வெளியீடு குறித்த அறிவிப்பு வரலாம். 2020ல் வெளிவந்த "சைக்கோ" படத்திற்குப் பிறகு ஐந்து வருட இடைவெளியில் வரப்போகும் மிஷ்கின் படம். மிஷ்கின், விஜய் சேதுபதி கூட்டணியின் முதல் படம். அதனால், இந்தப் படத்திற்கு எதிர்பார்ப்பு உள்ளது.

அரசன்

வெற்றிமாறன் இயக்கத்தில், அனிருத் இசையமைப்பில், சிலம்பரசன் நடிக்கும் படம். 2023க்குப் பிறகு சிம்பு தனி கதாநாயகனாக நடித்த படம் எதுவும் வரவில்லை. 2025ல் கமல்ஹாசனுடன் அவர் இணைந்து நடித்து வெளிவந்த "தக் லைப்" படம் தோல்வியைத் தழுவியது. வெற்றிமாறன் இயக்க, சிம்பு நடிக்க உள்ளார் என்ற செய்திகள் வெளியானது ஆச்சரியத்தை எழுப்பியது. தற்போது படப்பிடிப்பும் நடந்து வருகிறது. எந்த சிக்கலும் இல்லால் இந்தப் படம் முடிந்து 2026ல் வந்துவிட வேண்டும் என்று சிம்பு ரசிகர்கள்தான அதிகம் பிரார்த்தனை செய்து வருகிறார்கள்.

மகுடம்

விஷால் இயக்கம் நடிப்பில் ஜிவி பிரகாஷ்குமார் இசையமைப்பில், துஷாரா விஜயன், அஞ்சலி மற்றும் பலர் நடிக்கும் படம். "ஈட்டி, ஐங்கரன்" படங்களை இயக்கிய ரவி அரசு இயக்கத்தில் ஆரம்பமானபடம். அதன்பின் அவருக்கும், விஷாலுக்கும் மோதல் வர, ரவி அரசு படத்திலிருந்து விலக விஷால் இயக்குனர் பொறுப்பை கையில் எடுத்தார். அதிகாரப்பூர்வமாக விஷால் இயக்கும் முதல் படம் என்பதால், இந்தப் படத்தை அவர் எப்படி இயக்கி இருப்பார் என்ற ஆர்வம் சினிமா ரசிகர்களுக்குள் வருவது இயல்புதான், படம் வரும் வரை பொறுத்திருப்போம்.

ஜீனி

அர்ஜுனன் இயக்கத்தில், ஏஆர் ரஹ்மான் இசையமைப்பில், ரவி மோகன், கல்யாணி பிரியதர்ஷன், வாமிகா கபி, கிரித்தி ஷெட்டி மற்றும் பலர் நடிக்கும் படம். பேண்டஸி படமாக உருவாகி வரும் படம் 2025ல் வெளிவரும் என்று எதிர்பார்க்கப்பட்டது. இரண்டு மாதங்களுக்கு முன்பு பாடல் ஒன்றை வெளியிட்டார்கள். ஏஆர் ரஹ்மான் இசையமைக்கும் படம் கூட இப்படி தாமதமாகத் தயாராகி வருவது தமிழ் சினிமாவில் ஆச்சரியம்தான்.

ஜனவரி 9ல் வெளியாகும் "பராசக்தி" படத்தில் ரவி மோகன் வில்லன் கதாபாத்திரத்தில் நடித்துள்ளார். அடுத்தடுத்துது "ஜீனி, கராத்தே பாபு, ப்ரோ கோட்" என அவர் நடிக்கும் படங்களும், இயக்குனராக அறிமுகமாகும் "அன் ஆர்டினரி மேன்" படமும் வெளியாகலாம்.

காஞ்சனா 4

ராகவா லாரன்ஸ் இயக்கம், நடிப்பில், பூஜா ஹெக்டே, நோரா பதேஹி மற்றும் பலர் நடித்து வரும் படம். 2019ம் ஆண்டு "காஞ்சனா 3" படம் வெளிவந்து சுமாரான வரவேற்பையே பெற்றது. ஆறு ஆண்டுகளுக்குப் பிறகு அதன் 4வது பாகத்தை உருவாக்கி வருகிறார் ராகவா லாரன்ஸ். 2026ம் ஆண்டில் இந்தப் படம் வெளிவந்துவிடும். கடந்த ஆறு வருடங்களில் சினிமா டெக்னாலஜி எவ்வளவோ வளர்ந்துவிட்டது. அவற்றை இந்த பேய்ப் படத்தில் இறக்கி புதிய பேயை புதிய வடிவில் காட்டுவார் என்று நம்புவோம்.

மூக்குத்தி அம்மன் 2

சுந்தர் சி இயக்கத்தில், ஹிப்ஹாப் தமிழா இசையமைப்பில், நயன்தாரா, ஊர்வசி, ரெஜினா, யோகி பாபு மற்றும் பலர் நடிக்கும் படம். ராகவா லாரன்ஸ் போலவே "அரண்மனை" சீரிஸ் பேய்ப் படங்கள் மூலம் பேசப்பட்டவர் இயக்குனர் சுந்தர் சி. ஆர்ஜே பாலாஜி இயக்கத்தில் நயன்தாரா நடிப்பில் 2020ல் ஓடிடியில் வெளியாகி வரவேற்பைப் பெற்ற படம் மூக்குத்தி அம்மன். அந்தக் கூட்டணிக்குள் ஏதோ விரிசல், அதனால், "மூக்குத்தி அம்மன் 2" படத்தை சுந்தர் சி இயக்கி முடித்துள்ளார். "அரண்மனையும், அம்மனும்" கலந்த கலவையாக இந்தப் படத்தையும் சுந்தர் சி ரசிக்க வைப்பார் என்ற எதிர்பார்ப்பு திரையுலகத்தில் உள்ளது.

லவ் இன்சூரன்ஸ் கம்பெனி

விக்னேஷ் சிவன் இயக்கத்தில், அனிருத் இசையமைப்பில், பிரதீப் ரங்கநாதன், கிரித்தி ஷெட்டி, எஸ்ஜே சூர்யா மற்றும் பலர் நடித்துள்ள படம். 2025 தீபாவளிக்கு வரவேண்டிய படத்தை, டிசம்பர் 18க்குத் தள்ளி வைத்தார்கள். அன்றும் படம் வெளியாகவில்லை. எப்போது வரும் என்று இதுவரையிலும் சொல்லவில்லை. பிரதீப் ரங்கநாதன் நடித்து 2025ல் வந்த "டிராகன், டியூட்" இரண்டும் 100 கோடி படங்களாக அமைந்தது. இந்த "லவ் இன்சூரன்ஸ் கம்பெனி"யும் வெளியாகி வெற்றி பெறும் என்று எதிர்பார்க்கப்பட்டது. ஆனால், வெளியீடு தள்ளிப் போவதைக் கூட அறிவிக்க மனமில்லாமல் சண்டை போட்டுக் கொண்டிருக்கிறார்கள் என்பது கோலிவுட் தகவல்.

இந்தப் படங்கள் தவிர, கமல்ஹாசன் தயாரிப்பில் ரஜினிகாந்த் நடிக்க உள்ள அவரது 173வது படம், அன்பறிவ் இயக்கத்தில் கமல்ஹாசன் நடிக்கும் அவரது 237வது படம், ஆதிக் ரவிச்சந்திரன் இயக்கத்தில் அஜித் நடிக்கவுள்ள அவரது 64வது படம், ராஜ்குமார் பெரியசாமி இயக்கத்தில் தனுஷ் நடிக்கப் போகும் அவரது 55வது படம் என சில படங்கள் 2026ல் வெளியாகுமா அல்லது 2027க்குத் தள்ளிப் போகுமா என்பது இனிமேல்தான் தெரிய வரும்.

முன்னணி நடிகர்கள் படங்கள் அல்லாது, இதர நடிகர்கள், வளரும் நடிகர்கள் ஆகியோரது சில படங்களும் 2026ல் வர உள்ளது. 2025ஐப் போலவே இந்தப் படங்கள் ரசிகர்களின் கவனத்தை ஈர்த்து வெற்றி பெறவும் வாய்ப்புள்ளது.

2026ன் முதல் வெள்ளிக்கிழமையான ஜனவரி 2ம் தேதியன்றே 6 படங்கள் வெளியாக உள்ளன. அதனால், 2026லும் அதிக எண்ணிக்கையிலான படங்கள் வெளியாகலாம். எத்தனை படங்கள் வேண்டுமானாலும் வரட்டும், அதே சமயம், வெற்றிப் படங்களின் எண்ணிகையும் அது போல அதிகமாகட்டும். அதுதான் தமிழ் சினிமாவுக்கு ஆரோக்கியமானது.