டாக்சிக் பின்னணியில் ரஜினியின் படையப்பா : கீது மோகன்தாஸ்

சென்னையில் நடந்த டாக்சிக் பட நிகழ்ச்சியில் இயக்குனர் கீது மோகன்தாஸ் பேசியது.... ‛‛எனது நாலரை வயதில் குழந்தை நட்சத்திரமாக சினிமாவில் பயணத்தைத் தொடங்கினேன். அங்கிருந்து தொடங்கி இன்று எங்கு வந்து நிற்கிறேன் என்று நினைத்துப் பார்க்கிறேன். நான் பள்ளியில் சரியாகப் படிக்காத மாணவி, பலமுறை தேர்வுகளில் தோல்வியடைந்துள்ளேன், கூடைப்பந்து போன்றவற்றில் கூட என்னை யாரும் சேர்த்துக் கொண்டதில்லை.

அப்போது என் அப்பா என்னிடம் ஒரு விஷயம் கூறினார், "நீ எதிலும் தேற மாட்டாய் போல் தெரிகிறது, நீ என்னவாக விரும்புகிறாய்?" என்று கேட்டார். நான் "பேக்கர் (Baker)" ஆக வேண்டும் என்றேன். அதற்கு அவர், "நீ என்ன செய்தாலும், இந்த ஊரிலேயே மிகச் சிறந்த பேக்கராக இருக்க வேண்டும்" என்றார். அது என் மனதில் ஆழமாகப் பதிந்துவிட்டது எதைச் செய்தாலும் இலக்கில் மட்டுமே கவனம் செலுத்தி, மற்றவர்களின் பேச்சையோ சத்தத்தையோ பொருட்படுத்தாமல் முன்னேற வேண்டும் என முடிவெடுத்தேன் .

நான் "கேள்க்குந்நோ" (Kelkkunnundo) குறும்படத்தையும், 50 லட்சம் பட்ஜெட்டில் "லயர்ஸ் டைஸ்" (Liar"s Dice) திரைப்படத்தையும் இயக்கினேன் . அந்தப் படம் 2014-ல் ஆஸ்கர் வரை சென்றது; ஆனாலும் என் மீது யாரும் நம்பிக்கை வைக்கவில்லை, அடுத்த படத்திற்கு யாரும் பணம் கொடுக்க முன்வரவில்லை. பின்னர் "மூத்தோன்" (Moothon) படத்தை இயக்கினேன்; விமர்சன ரீதியாகப் பாராட்டு பெற்ற போதிலும், அடுத்த படத்திற்கான வாய்ப்புகள் போராட்டம் நிறைந்ததாகவே இருந்தன.

அப்போதுதான், நாட்டின் மிகப்பெரிய நட்சத்திரத்தை வைத்து ஒரு பிரம்மாண்ட திரைப்படத்தை இயக்க வேண்டும் என நினைத்தேன். எனது சிறுவயது முதல் இன்று வரை என் சினிமா பயணத்திலேயே யஷ் (Yash) மட்டுமே என் மீது முழு நம்பிக்கை வைத்தார். "இதை நீ செய், களத்தில் இறங்கு, உனக்கு என்ன வேண்டுமோ அதைச் செய்" என்று தைரியம் தந்தார் . அவர் என் மீது நம்பிக்கை வைத்த பிறகுதான் ஒட்டுமொத்த உலகமும் என் மீது நம்பிக்கை வைக்கத் தொடங்கியது.

நான் சன்டான்ஸ் (Sundance), ரோட்டர்டாம் (Rotterdam) போன்ற உலகளாவிய திரைக்கதை பயிலரங்குகளில் (Script Labs) கலந்து கொண்டுள்ளேன். ஆனால் "யஷின் லேப்" முற்றிலும் வேறுபட்ட ஒரு தளம். அவர் எனக்கு "படையப்பா" போன்ற தீவிர கமர்ஷியல் படங்களைக் காட்டினார்; நான் அவருக்கு "இன் தி மூட் பார் லவ்" (In the Mood for Love) போன்ற உலக சினிமாக்களைக் காட்டினேன். அந்த இருவேறு உலகங்களின் சங்கமத்தில் தான் "டாக்சிக்" உருவானது.

யஷ் எப்போதும் திரைக்கதையை முழுமையாகப் பக்கங்களில் கொண்டு வர வேண்டும் என்பார். இதில் நடித்துள்ள அனைத்து கதாபாத்திரங்களும் முற்றிலும் மாறுபட்ட பரிமாணத்தில் இருக்கும். நான் ஒன்றை உறுதியாகக் கூற முடியும். இந்தப் படத்தில் நீங்கள் பார்க்கப்போவது "யஷ் 2.0" (Yash 2.0) ஆக இருக்கும். எந்தவொரு படத்திற்கும் பின்னணியில் தூணாக நிற்பவர்கள் தயாரிப்பாளர்கள்தான். அனைத்து அழுத்தங்களையும் தாங்கி இந்தப் படத்தை உருவாக்கிய தயாரிப்பாளர் வெங்கட் சாருக்கு நன்றி. ஆரம்பத்தில் யஷை நம்பி வந்த நீங்கள், இன்று என்னையும் நம்புகிறீர்கள் என்பது எனக்கு தெரியும் மிக்க நன்றி"" என்றார்.