தினமலர் முன்னோட்டம் » காதல் அகதீ

100 படங்களுக்கு மேல் நடன இயக்குனராக பணியாற்றிய ஹரிகுமார் தூத்துக்குடி படத்தின் மூலம் ஹீரோவாக அறிமுகமானார். அதன் பிறகு போடிநாயக்கனூர் கணேசன், திருத்தம், மதுரை சம்பவம் படங்களில் நடித்தார். சங்கராபுரம் என்ற படத்தில் நடித்து முடித்துள்ளார். அது இன்னும் வெளிவரவில்லை. இந்த நிலையில் தற்போது காதல் அகதீ என்ற படத்தில் நடித்து வருகிறார்.

உள்ளூர் மார்க்கெட்டில் காய்கறி மண்டி நடத்தும் தாதாவுக்கு சாதாரண ஏழை வீட்டு பெண் மீது காதல். தன் மிரட்டலால் அத்தனை பேரையும் பணிய வைக்கும் தாதாவுக்கு மிரட்டி காதலை பணிய வைக்க முடியவில்லை. பிறகு எப்படி அவளது காதலை பெறுகிறான் என்பதுதான் கதை. தாதாவாக ஹரிகுமாரும், ஏழை வீட்டு பெண்ணாக புதுமுகம் ஆயிஷாவும் நடிக்கிறார்கள். இவர்கள் தவிர மம்தா ராவத், பாண்டியராஜன், தேவதர்ஷினி, சிங்கமுத்து உள்பட பலர் நடிக்கிறார்கள். ஷியாம் சுந்தர் ஒளிப்பதிவு செய்துள்ளார். பர்ஹான் ரோஷன் இசை அமைத்துள்ளார். புதுமுகம் ஷாமி திருமலை இயக்கி உள்ளார். ராமய்யா சினி கிரியேஷன் என்ற புதிய நிறுவனம் தயாரித்துள்ளது.