விஜய் ஜோடியானார் அமலாபால்! அதிகாரப்பூர்வ அறிவிப்பு

தாண்டவம் படம் கொஞ்சம் தடுமாறியதும் இயக்குனர் விஜய் படத்தில் இளையதளபதி விஜய் நடிக்க மாட்டார் என்ற செய்திகள் வெளியானது. ஆனால் விஜய் கொடுத்த வாக்குறுதியை காப்பாற்றி இயக்குனர் விஜய் படத்தில் நடிக்க இருக்கிறார். இதற்கான அதிகாரபூர்வ அறிவிப்பு வெளியிடப்பட்டு இருக்கிறது. படத்தை தயாரிப்பவர் சந்திரபிரகாஷ் ஜெயின். ரிக்ஷா மாமா, பாட்டுக்கு நான் அடிமை, டி.ராஜேந்தரின் வசந்த கீதம் உள்பட பல படங்களை தயாரித்தவர். கரகாட்டக்காரன், சின்னத்தம்பி, காஞ்சனா உள்பட 200 படங்களுக்கு மேல் விநியோகம் செய்தவர். இவரது மிஷ்ரி புரொடக்ஷன்தான் இந்தப் படத்தை தயாரிக்கிறது.

விஜய் ஜோடியாக நடிப்பவர் எல்லோரும் எதிர்பார்த்ததைப்போலவே அமலா பால். இயக்குனர் விஜய்க்கும், அமலாபாலுக்கும் காதல் என்ற செய்தி பரவிக்கிடந்த நேரத்தில் அதை கடுமையாக மறுத்தவர் விஜய். தன் காதல் பரிசாக அமலாபாலை விஜய்க்கு ஜோடியாக்க போகிறார் என்ற செய்தியையும் மறுத்தார். ஆனால் இப்போது அமலாபால்தான் ஹீரோயின் என்று முறைப்படி அறிவிக்கப்பட்டுள்ளது. (இப்போது என்ன சொல்லவாரோ தெரியவில்லை).

மற்ற நடிகர் நடிகைகள் தேர்வு நடந்து வருகிறது. அனைத்து அம்சங்களும் நிறைந்த பொழுதுபோக்கு படமாக இப்படம் இருக்கும் என்றும், படப்பிடிப்பு வெளிநாட்டில் நவம்பர் மாதம் துவங்குகிறது என்றும் அறிவித்திருக்கிறார்கள். படத்திற்கு இன்னும் பெயர் வைக்கவில்லை. தலைவன், அல்லது தலைவர் என்று பெயர் வைக்கலாம் விஜய்யின் பட்டப்பெயரான இளையதளபதி என்பதையே படத்தின் பெயராக வைக்கலாமா? என்றும் யோசித்துக் கொண்டிருக்கிறார்கள்.

இதுகுறித்து இயக்குனர் விஜய் கூறும்போது "படத்தின் தலைப்பு பற்றி இப்போது யோசிக்கவில்லை. தலைவன் நல்ல தலைப்புதான் ஆனால் அதை இன்னொருவர் பதிவு செய்து வைத்திருக்கிறார். அதனால் தலைப்பு பற்றி யோசித்து வருகிறோம். விஜய் ரசிகர்களுக்கு விருந்து வைக்கிற படமாக இருக்கும் இப்போதைக்கு இவ்வளவுதான் சொல்ல முடியும்" என்று முடித்துக் கொண்டார்.

முதல் கட்டமாக விஜய் அமலாபால் சம்பந்தப்பட்ட வெளிநாட்டு பாடல் காட்சிகளை படம்பிடிக்க வெளிநாடு போகிறார்கள். படத்துக்காக 5 பாடல்களை தயார் செய்து கொடுத்திருக்கிறார் ஜி.வி.பிரகாஷ். நீரவ்ஷா ஒளிப்பதிவு செய்கிறார். ஆண்டனி எடிட் செய்யப்போகிறார். பாடல்களை நா.முத்துகுமார் எழுதியுள்ளார். தமிழ் புத்தாண்டில் படத்தை வெளியிட திட்டமிட்டிருக்கிறார்கள்.

விஜய் அண்ட் விஜய் கூட்டணி விண் பண்ணி டிரிபிள் வி ஆகட்டும்...