தினமலர் விமர்சனம் » மிரர் கேம் (ஹிந்தி)

நடிகர்கள் : பிரவின் தபாஸ், பூஜா பத்ரா

விஜித் சர்மா இயக்கத்தில், பிரவின் தபாஸ் மற்றும் பூஜா பத்ரா நடிப்பில் வெளியாகியிருக்கும் சைக்கலாஜிக்கல் திரில்லர் படம் தான் "மிரர் கேம்". இப்படம் ரசிகர்களை மிரள வைத்ததா... என்று இனி பார்ப்போம்.

கதைப்படி, அமெரிக்காவின் நியூஜெர்சி நகரில் புரொபசராக பணியாற்றுபவர் ஜெய் வர்மா எனும் பிரவின் தபாஸ். இல்வாழ்க்கையிலும், செய்யும் வேலையிலும் ஏகப்பட்ட பிரச்னைகளால் நிம்மதி இல்லாமல் இருக்கிறார். ஒருநாள் மாணவர் ரோனி எனும் துருவ் பாலி, தன்னுடைய புராஜெக்ட் ஆராய்ச்சிக்கு, புரொபசர் ஜெய் வர்மாவை அழைக்கிறார். ஜெய் வர்மாவும் உதவ முன் வருகிறார், ஆனால் ஒரு நிபந்தனை விதிக்கிறார். அதாவது, தனது மனைவியை கொலை செய்ய வேண்டும், அப்படி செய்தால் ரோனியின் புராஜெக்ட்டை முடித்து தருவதாக சொல்கிறார். இந்த சூழ்நிலையில் ஜெய் வர்மாவின் மனைவி தன்யா, ஒருநாள் காணாமல் போகிறார். அவர் காணாமல் போனாரா...? அல்லது ரோனி கொலை செய்தாரா...? என்பது சஸ்பென்ஸ் நிறைந்த மிரர் கேம் படத்தின் மீதிக்கதை.

ஒரு சஸ்பென்ஸ் நிறைந்த திரில்லர் கதையில் நடிகர் பிரவின் தபாஸ், பல இடங்களில் ஆச்சர்யப்படும் அளவுக்கு சிறப்பான நடிப்பையும் வழங்கியிருக்கிறார். பல இடங்களில் என்னடா இப்படி நடித்திருக்கிறார் என்று கேள்வி கேட்கவும் வைத்திருக்கிறார்.

துருவ் பாலி, பூஜா பத்ரா, ஓமி வைத்யா என ஏகப்பட்ட பேர் நடித்திருக்கிறார்கள். ஆனாலும் பெரிதாக யாரும் கவரவில்லை. குறிப்பாக நடிகை பூஜா, தனக்கு படத்தில் ஒரு முக்கியமான ரோல், படம் முழுக்க பயணிக்கும் ரோல் என்று கூறியிருந்தார். ஆனால் சில காட்சிகளில் தான் அவர் வருவது ஏமாற்றம்.

அறிமுக இயக்குநர் விஜித் சர்மா, மிரர் கேம் படத்தை இயக்கியிருக்கிறார். அறிமுக இயக்குநர் என்பதாலோ என்னவோ ஒருவித பயத்துடனே படத்தை இயக்கி இருப்பார் போல.... நிறைய லாஜிக் மீறல்களும், தவறுகளும் படத்தில் ஆங்காங்கே தென்படுகின்றன. அதுவும் சஸ்பென்ஸ் திரில்லர் படத்தை சஸ்பென்ஸ் இல்லாமல் கொண்டு போய் உள்ளார். இசை, ஒளிப்பதிவு, படத்தொகுப்பு, வசனங்கள் போன்றவையும் ரசிகர்களை பெரிதாக ஈர்க்கவில்லை.

மொத்தத்தில், "மிரர் கேம் - ஏமாற்றம்!"

ரேட்டிங் : 2/5