தினமலர் விமர்சனம்
நடிகர் விஜயின் சித்தி மகன் விக்ராந்த் நடித்து அவரது சகோதரர் சஞ்சீவ் இயக்கத்தில் உருவாகி., கலைப்புலி எஸ்.தாணு உலகம் முழுவதும் வெளியிட்டிருக்கும் ஆக்ஷன் , சென்டிமெண்ட் படம் தான் தாக்க தாக்க. விக்ராந்தின் நட்பு நாயகர்கள் விஷால், ஆர்யா, விஷ்ணு விஷால் மூவரும் விக்ராந்துடன் இணைந்து தாக்க தாக்க... எனத்தொடங்கி தொடரும் பாடலுக்கு ஆடி அசத்தியிருப்பது ஹைலைட்!
பெற்றவர்களாலும், கெட்டவர்களாலும் பாலியல் தொழிலாளி ஆக்கப்படும் ஒரு அபலைப் பெண்ணிற்கு பிறந்த குழந்தை., அநீதியை தட்டிக்கேட்கப்போய் தன் சிறுவயதிலேயே தாயை இழக்கிறான், வளர்ந்து பெரியவன் ஆனதும் மதுக்கடை பார் ஒன்றில் வேலைபார்த்தபடியே, நட்பிற்காகவும், அபலைப்பெண்களின் கற்பிற்காகவும் போராடும் அவன்., எதிர்பாராது தன் தாயின் சாவிற்கு காரணமானவனை சந்திக்கிறான். சந்தித்த அடுத்தவிநாடியே சிந்திக்க சிறிதும் இடம் கொடுக்காமல் கொதித்து கொலை செய்யும் அவன்., அதனால் தன் நண்பனை இழந்து துடிக்கிறான். அதன்பின், தன் நண்பனின் சாவிற்கு காரணமான தன் தாயின் சாவிற்கு காரணமானவனின் கூட்டாளிகளை எவ்வாறு பழிதீர்க்கிறான்? என்பது தான் தாக்க தாக்க படத்தின் தகதகக்கும் தடதடக்கும் மீதிக்கதை!
சத்யாவாக விக்ராந்த், கார்த்தியாக அரவிந்த் என இருநாயகர்கள். அதில் விக்ராந்துக்கு ஆக்ஷன் எபிசோட். அரவிந்துக்கு லவ் எபிசோட். இருவரும் தங்களது பாத்திரமறிந்து பக்காவாக நடித்திருக்கின்றனர். அதிலும் நண்பன் இருக்கும் இடத்தை காட்டிக்கொடுக்காத அரவிந்தும் சரி, நண்பனின் காதலியை காப்பாற்ற வேண்டி கொலைக்கும் துணியும் விக்ராந்தும் சரி, விஸ்வரூப நடிப்பில் திகில் கிளப்பிவிடுகின்றனர்.
நாயகியர் இஷ்டம் பார்வதி நிர்பன், அபிநயா இருவரில் அபிநயா அசால்டாக நடிக்கிறார்யா!
வில்லன்கள் ராகுல் வெங்கட் (இவரும் சிரஞ்சீவியின் சித்திமகனாம்...), அருள்தாஸ், போஸ்வெங்கட் மூவரும் அவர்களது வில்லத்தனமும், மாமாத்தனமும் கூட அபாரம்!.
இவர்கள் தவிர, லீமா, சார்லி, உமா பத்மனாபன், பாடலாசிரியர் கலைக்குமார் உள்ளிட்டவர்களும் அவர்கள் ஏற்று நடித்திருக்கும் பாத்திரங்களும் டபுள் ஓகே!
சுஜித்தின் ஒளிப்பதிவு, ஜேக்ஸின் இசையில் விஷால், ஆர்யா உள்ளிட்டவர்கள் பங்குபெறும் தாக்க தாக்க... பாடலும், பின்னணி இசையும் படத்திற்கு பெரும்பலம், ஆனால், அந்த பாடல் இப்படத்தில் இடம்பெறாமல், இன்டர்வெல் கேப்பில் ஒலி ஒளி பரப்பாவது ஏன் என்பது புரியாத புதிர்!
தவறான இடத்தில் பிறந்து வளரும் ஒருவனை, இந்த சமூகம் எவ்வாறு எல்லாம் வஞ்சிக்கிறது? அதை அவன் எப்படி பழிதீர்க்கிறான்.?! என்பதை சஞ்சீவின் எழுத்து, இயக்கத்தில் பக்காவாக சொல்லியிருக்கும் தாக்க தாக்க பி மற்றும் சி சென்டர் ரசிகர்களுக்கு பார்க்க பார்க்க சலிக்காது என நம்பலாம்!
மொத்தத்தில் தாக்க தாக்க ஒருமுறை பார்க்க ரசிக்க !!
------------------------------------------
குமுதம் சினிமா விமர்சனம்
தவறான முறையில் பிறந்து வளர்ந்த ஒருவனை இந்த உலகம் எப்படிப் பார்க்கும் என்பதை கருப்பு உலகத்தின் பின்னணியோடு வெளிச்சம் போட்டுக் காட்டும் படம். அப்படிப் பிறந்த ஒருவன் இந்த சமூகத்தை எப்படி பழிவாங்குகிறான் என்பதுதான் கதை.
பாலியல் தொழிலாளியாக்கப்படும் ஒரு இளம்பெண்ணிற்கு மகனாகப் பிறக்கும் விக்ராந்த், பாத்திரம் உணர்ந்து நடித்துள்ளார். தன் கண்முன்னே தன் தாய்க்கு நடக்கும் கொடுமைகளையும், தாய் கொலை செய்யப்படுவதையும் கண்டு கொதிக்கும் இடங்கள் டாப். நண்பனின் மனைவியைக் காக்க அவர் போராடும் இடங்கள், ஆக்ஷனில் ஸ்கோர் செய்கிறார்.
விக்ராந்தின் நண்பனாக வரும் அரவிந்த் இன்னொரு அனாதை. சென்னைக்கு ஓடிவந்த சிறுவன் விக்ராந்தை ஆதரிப்பதும், நண்பனைக் காட்டிக் கொடுக்காமல் உயிரை விடுவதும் மனதைத் தொடும் நடிப்பு.
லீமா, அபிநயா என இரு நாயகிகள். லீமா விக்ராந்துக்கு ஜோடி என்றாலும் பெரிதாக வாய்ப்பு இல்லை. அரவிந்துக்கு ஜோடியாக வரும் அபிநயா தனது அசால்ட்டான நடிப்பால் நிற்கிறார்.
ராகுல் வெங்கட், அருள்தாஸ், போஸ் வெங்கட் ஆகியோரின் வில்லத்தனம் டபுள் ஓகே. மாமாத்தனம் எரிச்சல்.
விஷால், ஆர்யா, விஷ்ணு ஆகியோர் பங்குபெரும் தாக்க.... தாக்க பாடல் படத்திற்கு பெரிய பலம். பின்னணி இசையும் பெரிய ப்ளஸ்.
சிறு வயதில் பெண்களை விபச்சாரத்தில் தள்ளிச் சீரழிக்கும் கும்பலின் கருப்பு உலகத்தை யதார்த்தமாகக் காட்டி, மனசைப் பிசைய வைக்கிறார் இயக்குநர். ஆக்ஷன், சென்டிமெண்ட் என்று படத்திற்கு விறுவிறுப்பு ஊட்டி பாஸ் ஆகிறார் இயக்குநர் சஞ்சீவ்.
தாக்க... தாக்க...: ரசிகர்ளின் மனதைத் தாக்கும்.
குமுதம் ரேட்டில்: ஓகே