தினமலர் விமர்சனம் » புலிவால்

தினமலர் விமர்சனம்

டிராபிக் ஜாம் மலையாள திரைப்படம், சென்னையில் ஒரு நாள் தமிழ்படமாக இங்கும் சக்கைபோடு போட்டதைத் தொடர்ந்து ஆர்.ராதிகா சரத்குமாரும், லிஸ்டின் ஸ்டீபனும் மீண்டும் இணைந்து மலையாளத்தில் சப்பாக் குரிச் எனும் பெயரில் பெரும் வெற்றி பெற்ற படத்தை ரீ-மேக் செய்து புலிவாலாக தயாரித்து தந்திருக்கின்றனர். (இது கொரிய மொழியில் போலீஸ்யூத் என்ற பெயரிலும் இவர்கள் எல்லோருக்கும் முன்பாக சக்கைபோடு போட்டது தனிக்கதை!)

கதைப்படி பெரும் பணக்கார வீட்டுப்பிள்ளை கார்த்திக் எனும் பிரசன்னாவுக்கு, பவித்ரா எனும் இனியாவுடன் திருமணம் நிச்சயிக்கப்படுகிறது. இத்தருணத்தில் கொஞ்சம் சபலபுத்திக்காரரான கார்த்திக் எனும் பிரசன்னா உடன் பணிபுரியும் மோனிகா எனும் ஓவியாவிடம் தனக்கு திருமணம் நிச்சயிக்கப்பட்ட தகவலையே சொல்லாமல் கட்டில் காதல் களியாட்டம் நடத்தி விடுகிறார். அதுசமயம் சும்மா இருக்காமல் ஒரு கிரேஸூக்கு அதை தன் விலை உயர்ந்த செல்போனிலும் படமாக்கி வைத்து கொண்டு அவ்வப்போது பார்த்து மகிழும் பிரசன்னா, ஒருநாள் தன் செல்போனை தொலைக்க, அது கிட்டி சூப்பர்மார்க்கெட் ஒன்றில் சேல்ஸ்மேனாக வேலைபார்க்கும் காசி எனும் விமலின் கையில் கிடைக்கிறது. அந்த போனை சந்தோஷமாக தன் வசம் வைத்துக் கொண்டு பிரசன்னாவை சுத்தலில் விடுகிறார் விமல்!

ஒருகட்டத்தில் அந்த செல்போனை அவசரமாக சார்ஜ் செய்ய தனக்கு தெரிந்த செல்போன் கடையில் கொடுக்கிறார் விமல். அதில் இருக்கும் பிரசன்னா - ஓவியா செக்ஸ் வீடியோ ஏற்றப்பட்டு உலகெங்கும் ஒலி-ஒளி பரப்பப்பட, விஷயம் தெரிந்ததும் டென்ஷனாகும் பிரசன்னா விமலைதேடி பிடிக்க துரத்துகிறார். ஓவியா தற்கொலை முயற்சிக்கிறார். தன் காதலி செல்வி எனும் அனன்யாவுடன் தன் செயலுக்கு வருந்தும் காசி-விமல், கார்த்திக்-பிரசன்னா கையில் சிக்கினாரா?, மோனிகா-ஓவியா உயிர்பிழைத்தாரா.?! இல்லையா.?! என்பது வித்தியாசமாகவும், விறுவிறுப்பாகவும் படமாக்கப்பட்டிருக்கும் மீதிக்கதை!

காஸ்ட்லி இடத்து பையன் கார்த்திக்காகவே வாழ்ந்திருக்கிறார் பிரசன்னா! கார்த்திக் எனும் பெயருக்கேற்றபடியே சபலபுத்திக்காரராக அல்லல்படுவதிலும் அலட்டிக் கொள்ளாமல் நடித்திருக்கிறார் பலே!

காசி எனும் விமல், யதார்த்தமான சூப்பர் மார்கெட் சேல்ஸ்மேனாக வழக்கம்போலவே ஸ்கோர் செய்திருக்கிறார். நடுத்தர வர்க்கத்து இளைஞரின் காஸ்ட்லீ செல்போன் ஆசையை கனகச்சிதமாக பதிவு செய்திருப்பதற்காக பாரட்டலாம் மனிதரை!

அனன்யா, ஓவியா, இனியா மூவரில் ஓவியா அந்தமாதிரி காட்சிகளில் செம ஸ்கோர் செய்திருக்கிறார் என்றால் அனன்யா, இனியா இருவரும் ஹோம்லி குத்துவிளக்குகளாக மின்னியிருக்கின்றனர்.

தம்பி ராமைய்யா, சூரி இருவரும் காமெடியில் கலக்கி இருக்கின்றனர். நோஜன் கே.தினேஷின் அழகிய ஒளிப்பதிவு, என்.ஆர்.ரகுநந்தனின் இனிய இசை உள்ளிட்ட ப்ளஸ் பாயிண்ட்டுகளுடன் ஜி.மாரிமுத்துவின் எழுத்து-இயக்கத்தில் ஒருசில லாஜிக் மிஸ்டேக்குகள்(குறிப்பாக பிரசன்னா தன்னை தேடி வருவது தெரிந்தும் தன்னிடம் உள்ள அவரது செல்போனை ஆப் செய்யாமல் வைத்திருக்கும் விமல்... போன்று...) இருந்தாலும் புலி வால் - வெற்றி வாள் என்றால் மிகையல்ல!

--------------------------------------------------------------


குமுதம் சினி விமர்சனம்

"சாப்ப குரிசு (பூவா தலையா) என்று மலையாளத்தில் சக்கை போடுபோட்ட படத்தின் தமிழ்வால் இது. தித்திப்பு கலந்த திக் திக் கதை!

இனியாவுடன் திருமணம் ஆகப் போகும் பணக்கார பிரசன்னா, தன் அலுவலகத் தோழி ஓவியாவுடன் ஜாலியாக இருந்ததை செல்போனில் வீடியோ எடுத்துக் கொள்கிறான். அந்த போன் காணாமல் போய், ஏழை விமல் கையில் கிடைக்கிறது. ஓவியா - பிரசன்னா குஜால் காட்சிகள் யூ டியூப்பில் வெளியாக, திருமணம் டமால். ஓவியா கழுத்தை அறுத்! பிரசன்னா, விமலை துரத்! அப்புறம் என்ன ஆச்சு? என்பதுதான் புலிவால்! (இயக்கம் மாரிமுத்து).

பிரசன்னா டைட் அண்ட் ஃபிட்!

ஓவியா ஜில் ஆண்ட் க்யூட் (எப்படித்தான் யூ சட்டிஃபிகேட் கொடுத்தார்களோ?)

கையில் கிடைத்த காஸ்ட்லி போனை எடுத்துக் கொள்ளவும் ஆசை; கொடுத்து விடவும் விருப்பம் என்று, லோயர் மிடில் க்ளாஸ் மெண்டாலிட்டியை விமல் கையாண்டிருப்பது அருமை. அனன்யாவும் ஓகே!

பாடல் காட்சிகளில் கேமராவுடன் ஆர்ட் டைரக்டரும் கை கோர்த்து அழகு செய்திருக்கிறார்.

ஆனால் தம்பி ராமய்யாவின் அசட்டுக் காதலுக்கு இளையராஜா பாடல்களை ஃபேக்ரவுண்டில் விட்டது அக்கிரமம்!

அதேபோல் விறுவிறுப்பாகச் சென்று கொண்டிருக்கும் படத்துக்கு கரும்புள்ளி, சூரியின் அச்சு பிச்சு கடி ஜோக்குகள். தாங்க முடியல!

விமல், பிரசன்னா அருகருகே இருந்து கொண்டு கண்ணாமூச்சி விளையாடுவதும் பபிள் - கம்!

புலிவால் - எச்சரிக்கை!

குமுதம் ரேட்டில் - ஓகே