Dinamalar

சொல்லத்தான் நினைக்கிறேன் - ரசிகன் குரல் - சொல்லி அடித்த நடன கில்லிக்கு...

உங்களுக்கு இந்த கடிதத்தை எழுத நினைத்தவுடன், 'பத்தாவது முறை விழுந்தவனிடம் முத்தமிட்டு சொன்னது பூமி, ஒன்பது முறை எழுந்தவன் அல்லவா நீ' எனும் வைரமுத்துவின் கவி வரிகள் தான் என் நினைவுக்கு வந்தன. காரணம், நடன கலைஞர்கள் சங்கத்தில் உறுப்பினராவதற்கு கூட வசதி இல்லாத நிலையில் இருந்து, இன்றைக்கு நீங்கள் அடைந்திருக்கும் இந்த உயரமும்; சினிமா நடிகரான பின்பும், மனிதம் தொலைக்காத உங்களின் மனமும்!

நடனத்தில் தேர்ந்த உங்களை, ஒரு நடிகராக ஏற்றுக்கொள்ள சிலர் தயங்கிய போது, உங்களுக்கென ஒரு தனி நடிப்பு பாணியை உருவாக்கி ஜெயித்தீர்கள். பயமுறுத்தியே பழக்கப்பட்ட பேய்கள், தங்கள் தரப்பு நியாயத்தையும் பேசி, குழந்தைகளை சிரிக்கவும், சிந்திக்கவும் வைத்து, அவர்களின் மனதிற்குள் போய் சிம்மாசனமிட்டது, உங்கள் உழைப்புக்கு கிடைத்த வெற்றி. ஆனால், ஒரே விஷயத்தை மாற்றி மாற்றி செய்தால், குழந்தைகளுக்கும் கூட, ஒரு நாள் சலிப்பு தட்டி விடும் என்பதை நீங்கள் உணர வேண்டும்.

ஒரு நடிகராக நீங்கள் தேர்வு செய்த கதைகளுக்குள்ளும், இயக்குனராக உங்களுடைய கதை சொல்லும் முறையிலும், கலகலப்பையும் தாண்டி ஒருவித வலி இருந்தது. அந்த வலியை சரியாய் சொல்லும் வித்தை, உங்களுக்கு தெரிந்திருந்தது. திரட்சியான, ஆண்மை பொருந்திய ஒரு நடிகரை திருநங்கையாக்கி, அவரை எல்லோரையும் ஏற்றுக்கொள்ள வைத்தது அந்த வித்தை தான்! என்றாலும், அந்த யுக்தி 'காஞ்சனா 2'வில், கொஞ்சம் தடுமாறியிருக்கிறது. அதன் சாட்சியே, 'மொட்டை' ரவியின் தோல்வி.

இன்று, வியாபார ரீதியாக உங்கள் மீது இருக்கும் எதிர்பார்ப்புக்கு அடிப்படை, ரசிகர்கள் உங்கள் மீது வைத்திருக்கும் நம்பிக்கை! அந்த நம்பிக்கை தொடர வேண்டுமானால், இனிமேலும், இத்தகைய 'கண்கட்டி வித்தை' கதைகளை நம்பாதீர்கள்! நீங்கள் எப்போதும் ஜெயிக்க வேண்டும் என்ற விருப்பத்தின் பேரிலேயே இந்த வேண்டுகோள்; ஏற்றுக்கொள்வீர்கள் என நம்புகிறேன்.

இப்படிக்கு,

உங்கள் ரசிகன்.

• செய்திகள்
• ஆல்பம்
• வீடியோ
• வந்த படங்கள்

• 
  சல்மான் கானுக்கு ஜோடியாக கியாரா அத்வானி?
• 
  ‛ஜவான்' பாடலுக்கு நடனமாடிய மோகன்லால் : ஷாருக்கான் நன்றி
• 
  அயோத்தியில் இடம் வாங்கிய அமிதாப்பச்சன்
• 
  சினிமாவில் வளர திறமை மட்டுமே போதாது : பரிணிதி சோப்ரா
• 
  கபீர் சிங் படத்தில் நடித்தது நான் செய்த இமாலய தவறு ; பாலிவுட் நடிகர் ...